'బిచ్చగాడు' కన్నడ రీమేక్ లో విజయ్ దేవరకొండ?

'పెళ్లి చూపులు' సినిమాతో తనకి వచ్చిన క్రేజ్ ను 'అర్జున్ రెడ్డి' సినిమాతో విజయ్ దేవరకొండ అమాంతంగా పెంచేసుకున్నాడు. ప్రస్తుతం అయన చేతిలో అరడజను తెలుగు సినిమాలు వున్నాయి. ఈ ప్రాజెక్టులు పూర్తి చేయడానికే ఆయనకి రెండేళ్లు పడుతుంది. ఈ నేపథ్యంలో ఆయన కన్నడలో ఒక సినిమా చేయడానికి ఆసక్తిని చూపుతున్నట్టుగా వార్తలు వస్తున్నాయి.

 విజయ్ ఆంటోని కథానాయకుడిగా తమిళంలో చేసిన 'పిచ్చాయ్ క్కారన్' .. తెలుగులో 'బిచ్చగాడు'గా ప్రేక్షకుల ముందుకు వచ్చి, భారీ వసూళ్లను రాబట్టింది. అలాంటి ఈ సినిమాను కన్నడలో రీమేక్ చేయాలనుకున్న ఓ నిర్మాత, విజయ్ దేవరకొండను సంప్రదించినట్టు సమాచారం. ఈ రీమేక్ చేయడానికి విజయ్ దేవరకొండ అంగీకరించినట్టు చెప్పుకుంటున్నారు. ఇందులో వాస్తవమెంతో చూడాలి మరి.