ఉత్త‌ర‌ప్ర‌దేశ్‌ గోర‌ఖ్‌పూర్‌లోని ప్ర‌భుత్వాసుప‌త్రిలో ఆక్సిజ‌న్ అంద‌క కొన్ని రోజుల వ్య‌వ‌ధిలోనే సుమారు 100 మంది చిన్నారులు మృతి చెందిన దారుణ‌ ఘ‌ట‌న‌ను మ‌ర‌వ‌క‌ముందే ఛత్తీస్‌గఢ్‌ రాజధాని రాయ్‌పూర్‌లో ఇటువంటి ఘ‌టనే మరొక‌టి జ‌రిగింది. ఆ ప్రాంతంలోని అంబేద్క‌ర్ ఆసుప‌త్రిలో నిన్న ఆక్సిజన్‌ అందక ముగ్గురు చిన్నారులు ప్రాణాలు కోల్పోయారు. ఈ ఘ‌ట‌న‌పై విచార‌ణ ప్రారంభించిన పోలీసులు... స‌ద‌రు ఆస్పత్రి అటెండెంట్‌ రవిచంద్ర, మరో ఇద్దరు మద్యం తాగి విధులు నిర్వహిస్తున్నారని గుర్తించారు. వారి నిర్ల‌క్ష్యం వ‌ల్లే ముగ్గురు చిన్నారులు ప్రాణాలు కోల్పోయార‌ని చెప్పారు. ఈ కేసులో రవిచంద్రను అరెస్టు చేసినట్లు పోలీసులు తెలిపారు. ఆయ‌న‌ను ఆస్పత్రి ఉన్నతాధికారులు సస్పెండ్‌ చేశారు. ఈ ఘ‌ట‌న‌పై క్షేత్రస్థాయిలో విచార‌ణ జ‌ర‌పాల‌ని ఆ రాష్ట్ర ముఖ్యమంత్రి రమణ్‌సింగ్ ఆదేశించారు.