నంద్యాలలో కాపు, బలిజల ఓట్లు 30 వేలు... పవన్ మద్దతు కోరనున్న చంద్రబాబు!

మూడేళ్ల క్రితం జరిగిన అసెంబ్లీ ఎన్నికల్లో తెలుగుదేశం, బీజేపీ కూటమికి పవర్ స్టార్ పవన్ కల్యాణ్ మద్దతుగా నిలిచిన సంగతి తెలిసిందే. ఆ ఎన్నికల్లో పవన్ ప్రచారం టీడీపీకి అధికారంలోకి రావడానికి కలిసొచ్చింది కూడా. ఆ తరువాత జరిగిన పరిణామాలు తెలుగుదేశం పార్టీకి పవన్ ను కాస్తంత దూరం చేశాయనే చెప్పవచ్చు. భూమా నాగిరెడ్డి మరణం తరువాత నంద్యాల ఉప ఎన్నికలు జరగనున్న నేపథ్యంలో, ఎలాగైనా ఈ స్థానాన్ని గెలుచుకోవాలని భావిస్తూ సర్వశక్తులూ ఒడ్డుతున్న టీడీపీ, నియోజకవర్గంలో నిర్ణయాత్మకమైన కాపు, బలిజల ఓట్లపై కన్నేసింది. నంద్యాల సెగ్మెంట్ లో 30 వేల వరకూ ఈ వర్గం ప్రజల ఓట్లు ఉన్నాయి. వీటితో పాటు యువ ఓటర్ల సంఖ్య కూడా అధికంగానే ఉంది.

పవన్ కల్యాణ్ మద్దతిస్తే, కాపు, బలిజ వర్గం ఓట్లు అధిక మొత్తంలో పడతాయని భావిస్తున్న చంద్రబాబు, ఈ మధ్యాహ్నం పవన్ తో సమావేశమైన వేళ ఆయన మద్దతు కోరవచ్చని రాజకీయ వర్గాలు విశ్లేషిస్తున్నాయి. అయితే, మూడేళ్ల నాడు పవన్ కల్యాణ్ పార్టీ జనసేన రాజకీయాల్లో చురుకుగా లేదు. కానీ ఇప్పుడు పరిస్థితి మారింది. ఆ పార్టీ జిల్లా స్థాయిలో బలోపేతమైంది కూడా. ఈ నేపథ్యంలో జనసేన తరపున అభ్యర్థిని బరిలోకి దింపుతారా? లేకుంటే టీడీపీకి మద్దతు పలుకుతారా? అన్న ప్రశ్నకు సమాధానం ఇంకా పవన్ నోటి నుంచి ఇంకా బయటకు రాలేదు. మరోవైపు వైసీపీ కూడా పవన్ మద్దతు పొందేందుకు ప్రయత్నాలు ప్రారంభించినట్టు సమాచారం.