షాకింగ్.. సినీ హీరోయిన్ భావన కిడ్నాప్... కారులోనే లైంగిక వేధింపులు

సినీ నటి భావన లైంగిక వేధింపులకు గురైన ఘటన కలకలం రేపుతోంది. నిన్న రాత్రి షూటింగ్ పూర్తి చేసుకుని తిరిగి వెళుతున్న సమయంలో... ఆమె కారును కొందరు అడ్డగించి, ఆమెను ఎత్తుకెళ్లారు. ఆ తర్వాత కారులోనే ఆమెను లైంగికంగా వేధించారు. దాదాపు గంట సేపు లైంగిక వేధింపులకు గురి చేసిన తర్వాత ఆమెను వదిలేశారు. ఈ క్రమంలో, భావనకు సంబంధించిన ఫొటోలను, వీడియోలను కూడా వారు తీసినట్టు తెలుస్తోంది. ఈ ఘటన కేరళలోని ఎర్నాకుళం జిల్లాలో జరిగింది.

ఈ కేసుకు సంబంధించి, ఆమె పాత డ్రైవర్ మార్టిన్ ను పోలీసులు అదుపులోకి తీసుకున్నారు. కీలక నిందితుడు సునీల్ పరారీలో ఉన్నాడు. వీరిపై కిడ్నాప్ తో పాటు, లైంగిక వేధింపుల కింద పోలీసులు కేసు నమోదు చేశారు. వేధింపులకు గురైన తర్వాత ఆ విషయాన్ని మొదట డైరెక్టర్ కు తెలిపింది భావన. దీంతో, ఆయన పోలీసులకు సమాచారం అందించాడు. తెలుగులో కూడా భావన నిప్పు, ఒంటరి, మహాత్మా, హీరో తదితర చిత్రాల్లో నటించింది.