ఈ సదస్సు నిర్వహించాలనే ఆలోచన వచ్చింది అక్కడే: చంద్రబాబు
జాతీయ మహిళా పార్లమెంటేరియన్ సదస్సు నిర్వహించాలనే ఆలోచన పుణె పర్యటనకు వెళ్లినప్పుడు వచ్చిందని సీఎం చంద్రబాబు నాయుడు అన్నారు. అమరావతిలో నిర్వహిస్తున్న జాతీయ మహిళా పార్లమెంటేరియన్ ముగింపు సదస్సులో ఆయన మాట్లాడుతూ, అమరావతిలో ఈ సదస్సు నిర్వహించేందుకు స్పీకర్ సుమిత్రా మహాజన్ అంగీకరించారని అన్నారు. ఈ సదస్సు లక్షలాది మందికి స్ఫూర్తి నిచ్చిందని, సమస్యలకు పరిష్కారం దొరుకుతుందనే నమ్మకం కలిగించిన ఈ సదస్సు, ఒక ప్రభంజనం సృష్టించిందని అన్నారు. ఈ తరహా సదస్సు ఒక్కసారితో ఆగిపోకూడదని, ప్రతి ఏటా నిర్వహించాల్సిన అవసరముందని అన్నారు. మహిళలకు పురుషులతో సమాన అవకాశాలు వచ్చే వరకూ వారికి అండగా ఉంటానని హామీ ఇచ్చారు. మహిళలకు చట్టసభల్లో 33 శాతం రిజర్వేషన్లు కల్పించాలని చంద్రబాబు పేర్కొన్నారు.
