ఇప్పటివరకు రూ.70 వేల కోట్ల న‌ల్ల‌ధ‌నం బ‌య‌టికొచ్చింది: లోక్ సభ‌లో అరుణ్‌జైట్లీ
న‌ల్ల‌ధ‌నంపై ప్ర‌ధాని న‌రేంద్ర మోదీ రాజీలేని పోరాటం చేస్తున్నార‌ని కేంద్ర ఆర్థిక శాఖ మంత్రి అరుణ్‌జైట్లీ అన్నారు. ఆదాయ‌ప‌న్ను చ‌ట్ట స‌వ‌ర‌ణ బిల్లుపై ఈ రోజు ఆయ‌న మాట్లాడారు. అయితే, ఆయ‌న ప్ర‌సంగిస్తుండ‌గా విప‌క్షాలు పెద్ద ఎత్తున నినాదాలు చేశాయి. లోక్‌స‌భ‌లో హ‌డావుడిగా ఆ బిల్లు ప్రవేశ‌పెట్టార‌ని విప‌క్షాలు విమర్శించాయి. విప‌క్ష నేత‌ల ఆందోళ‌న మ‌ధ్యే జైట్లీ మాట్లాడుతూ.. విదేశాల్లో ఉన్న న‌ల్ల‌ధ‌నాన్ని తెచ్చేందుకు కొత్త చ‌ట్టం తీసుకొచ్చామ‌ని అన్నారు.
ప్ర‌ధాన‌మంత్రి న‌రేంద్ర మోదీ ఈ నెల 8న న‌ల్ల‌ధ‌నాన్ని అరిక‌ట్టేందుకు పెద్దనోట్లను ర‌ద్దు చేసేందుకు సాహ‌సోపేత నిర్ణ‌యం తీసుకున్నారని జైట్లీ అన్నారు. న‌ల్ల‌ధ‌నం అనేది ఉండ‌కూడ‌ద‌నే ఈ నిర్ణ‌యం తీసుకున్న‌ట్లు చెప్పారు. పెద్దనోట్లను ర‌ద్దు చేసిన‌ప్ప‌టినుంచి ఇప్ప‌టి వ‌ర‌కు 70 వేల కోట్ల రూపాయ‌ల న‌ల్ల‌ధ‌నం బ‌య‌టికొచ్చిందని చెప్పారు. విదేశాల్లోని న‌ల్ల‌ధ‌నాన్ని తీసుకురావ‌డానికి ప్ర‌భుత్వం త‌గిన‌న్ని చ‌ర్య‌లు చేప‌ట్టిందని అన్నారు. మ‌రోవైపు, ఐటీ స‌వ‌ర‌ణ బిల్లుపై ఓటింగ్‌కు కాంగ్రెస్ ప‌ట్టుప‌డుతోంది.
