డాక్టర్ పై పలుమార్లు లైంగిక దాడి... సాఫ్ట్ వేర్ ఇంజినీర్ అరెస్ట్
హైదరాబాదులో సాఫ్ట్ వేర్ ఇంజినీర్ గా పనిచేస్తున్న మనోజ్ (30)ను పోలీసులు అరెస్ట్ చేశారు. అత్యాచార నిరోధక చట్టాల కింద కేసు నమోదు చేశారు. వివరాల్లోకి వెళ్తే, రాజేంద్రనగర్ పరిధిలోని బండ్లగూడ జాగీర్ లో ఉన్న ఓ అపార్ట్ మెంట్ లో మనోజ్ ఉంటున్నాడు. అతని ఎదురు ప్లాట్ లో ఉత్తరప్రదేశ్ కు చెందిన వైద్యురాలు ఉంటోంది. ఒక రోజు తనకు వైద్యం చేయడానికి పిలిచి, ఆమెకు మత్తుమందు కలిపిన కూల్ డ్రింక్ ఇచ్చాడు. అనంతరం ఆమెపై అఘాయిత్యానికి పాల్పడ్డాడు. ఆ తర్వాత, జరిగిన విషయాన్ని బయటపెడతానని బెదిరిస్తూ, పలుమార్లు లైంగిక దాడి జరిపాడు. తీవ్ర మానసిక క్షోభను అనుభవిస్తున్న ఆ వైద్యురాలు, చివరకు నిన్న రాజేంద్రనగర్ పోలీసులకు ఫిర్యాదు చేసింది. దీంతో, జరిగిన విషయం వెలుగులోకి వచ్చింది. ఈ క్రమంలో, మనోజ్ ను కఠినంగా శిక్షించాలని బాధితురాలి తల్లిదండ్రులు, అపార్ట్ మెంట్ వాసులు డిమాండ్ చేస్తున్నారు.
