బ్రెయిలీ లిపిలో యోగా పుస్తకం... ఆవిష్కరించిన రాష్ట్రపతి
'యోగి కా స్పర్శ్' పేరుతో బ్రెయిలీ లిపిలో ప్రచురించిన పుస్తకాన్ని రాష్ట్రపతి ప్రణబ్ ముఖర్జీ ఆవిష్కరించారు. బీజేపీ సీనియర్ నేత, ఎంపీ మురళీ మనోహర్ జోషి కుమార్తె, యోగా టీచరైన నివేదితా జోషి ఈ పుస్తకాన్ని రాశారు. రాష్ట్రపతి భవన్ లో ఈరోజు జరిగిన పుస్తకావిష్కరణ కార్యక్రమానికి జోషీ దంపతులు కూడా హాజరయ్యారు. ఈ సందర్భంగా ప్రణబ్ మాట్లాడుతూ, మనిషి శారీరక, మానసిక, నైతిక వికాసానికి యోగా చక్కటి పరిష్కారమని పేర్కొన్నారు. యోగా గొప్పతనాన్ని ఆధునిక వైద్యశాస్త్రం కూడా అంగీకరిస్తోందని చెప్పారు. అంధులకు కూడా యోగాను అందుబాటులోకి తేవాలనే ఉద్దేశంతోనే ఈ పుస్తకాన్ని తీసుకొచ్చినట్టు ఈ సందర్భంగా జోషి కుమార్తె నివేదిత తెలిపారు.
