బీసీసీఐ టైటిల్ స్పాన్సర్ ఎవరయ్యేనో!
భారత క్రికెట్ కంట్రోల్ బోర్డు (బీసీసీఐ) టైటిల్ స్పాన్సర్ షిప్ కోసం బిడ్లను ఆహ్వానిస్తోంది. ఈ ఏడాది సెప్టెంబర్ నుంచి వచ్చే ఏడాది ఏప్రిల్ మధ్య కాలానికి ఈ స్పాన్సర్ షిప్ వర్తిస్తుంది. అంతర్జాతీయ, దేశవాళీ క్రికెట్ మ్యాచ్ ల కోసం తాము ఈ బిడ్లను ఆహ్వానిస్తున్నట్టు బీసీసీఐ కార్యదర్శి సంజయ్ పటేల్ తెలిపారు. బిడ్లను ఈ నెల 6 నుంచి 28 వరకు స్వీకరిస్తారు. అధిక ధర కోట్ చేసిన సంస్థకు ఆయా మ్యాచ్ ల టైటిల్ స్పాన్సర్ షిప్ హక్కులు దక్కుతాయి. గత సీజన్ లో స్టార్ ఇండియా ఈ హక్కులు చేజిక్కించుకుంది.
ఈ సెప్టెంబర్ నుంచి వచ్చే ఏప్రిల్ మధ్య కాలంలో టీమిండియా మూడు టెస్టులు, ఐదు వన్డేలు ఆడనుంది. దేశవాళీ పోటీల్లో భాగంగా రంజీ ట్రోఫీ, ఇరానీ కప్, దులీప్ ట్రోఫీ, విజయ్ హజారే ట్రోఫీ, దేవధర్ ట్రోఫీ పోటీలు జరుగుతాయి.
