చోగమ్ సదస్సు పై తుది నిర్ణయం ప్రధానిదే : కేంద్రమంత్రి

30-03-2013 Sat 15:57

శ్రీలంక రాజధాని కొలంబోలో ఈ ఏడాది నవంబర్లో జరగనున్న కామన్ వెల్త్ దేశాధినేతల సమావేశం (చోగమ్ సమిట్)ను భారత్ బహిష్కరించాలంటూ ఒత్తిడి పెరుగుతున్న నేపథ్యంలో ప్రధాని కార్యాలయంలో మంత్రి వి.నారాయణ స్వామి ఈరోజు ఓ ప్రకటన చేశారు. `చోగమ్` విషయంపై విదేశీ వ్యవహారాల మంత్రి సల్మాన్ ఖుర్షీద్ తో చర్చించిన తర్వాతే ప్రధానమంత్రి మన్మోహన్ సింగ్ తుది నిర్ణయం తీసుకుంటారని తెలిపారు.

ఈ అంశం మీద ఇప్పటికే తమిళనాట పెద్ద చర్చే జరుగుతోంది. కామన్ వెల్త్ సమావేశాల్లో భారత్ పాల్గొన కూడదని తమిళనాడు అసెంబ్లీ ఆమోదించిన తీర్మానాన్ని, ఇప్పటికే కేంద్ర ప్రభుత్వానికి పంపింది. ఇదే విషయంపై కరుణానిధి నేతృత్వంలోని డీఎంకే పార్టీకూడా తమ పార్టీ కార్యవర్గ సమావేశంలో తీర్మానం చేసింది. ఈ అంశం మీద తాజాగా యూనియన్ షిప్పింగ్ మినిస్టర్ జికె వాసన్ కూడా గొంతు కలిపారు.

శ్రీలంకలో తమిళులపై జరుగుతోన్న అఘాయిత్యాలపై కొన్ని రోజులుగా, తమిళనాడు ప్రభుత్వం, ప్రజలు తీవ్రంగా అసహనం వెళ్లగక్కుతోన్న సంగతి తెలిసిందే. ఈ క్రమంలో భారత్ తో శ్రీలంకకు సంబంధం ఉన్న ప్రతి విషయంలోను తమిళులు తమ వ్యతిరేకత వ్యక్తం చేస్తున్నారు.