దశాబ్దాల చరిత్రగల గోడను కూల్చేశారు

రెండో ప్రపంచ యుద్ధానంతరం ఏర్పడిన వైషమ్యాలు పశ్చిమ జర్మనీ, తూర్పు జర్మనీల మధ్య బెర్లిన్ కుడ్యానికి పునాది వేశాయి. తూర్పు జర్మనీలో అధికారంలో ఉన్న కమ్యూనిస్టు ప్రభుత్వం 1961లో ఈ చారిత్రాత్మక గోడను నిర్మించింది. పశ్చిమ జర్మనీ నుంచి వలసలను అరికట్టడమే ఈ భారీ కట్టడం వెనుక ప్రధాన కారణం. ఆ సమయంలో పశ్చిమ జర్మనీలో ప్రజాస్వామ్యం రాజ్యమేలుతోంది.

సైద్ధాంతిక విభేదాలకు, ప్రపంచ పరిణామాలు తోడవడంతో రూపుదిద్దుకున్న ఈ 96 మైళ్ళ గోడ జర్మన్లను నిలువునా విడదీసింది. బంధువులు, స్నేహితులు, ఇరుగుపొరుగు ఇలా అందరినీ 30 ఏళ్ళ పాటు విభజించిన ఈ మహా కుడ్యం 1989లో రష్యా జోక్యంతో కుప్పకూలింది. జర్మన్ల ఏకీకరణ ఘట్టానికి సాక్ష్యంగా కొంత మేర ఈ గోడ అవశేషాలు మిగిలే ఉన్నాయి.

వాటిలో తూర్పు వైపు భాగంలో 120 మంది చిత్రకారులు తమ అద్భుతమైన పెయింటింగ్ నైపుణ్యంతో పలు చిత్రాలు ఈ కుడ్యంపై గీశారట. ఇప్పుడది జర్మనీలో ప్రముఖ పర్యాటక స్థలంలా బాసిల్లుతోంది. ఇప్పుడా గోడను ఓ అపార్ట్ మెంట్ కోసం కూల్చివేయడాన్ని బెర్లిన్ వాసులు సహించలేకపోతున్నారు. భవంతి నిర్మాణదారులు లాభాల కోసం చరిత్రను మట్టిలో కలిపేస్తున్నారని వారు ఆవేదన వ్యక్తం చేస్తున్నారు.