భారత మహిళకు 'అంతర్జాతీయ ధీర వనిత' అవార్డు
భారతీయ మహిళ, యాసిడ్ దాడి బాధితురాలు లక్ష్మికి ప్రతిష్ఠాత్మకమైన అమెరికా ప్రభుత్వ 'అంతర్జాతీయ ధీర వనిత' అవార్డు దక్కింది. విదేశాంగశాఖ వాషింగ్టన్ లో నిర్వహించిన ఒక కార్యక్రమంలో ఆ దేశ ప్రథమ మహిళ మిషెల్లీ ఒబామా ఈ అవార్డును ప్రదానం చేశారు. 16 ఏళ్ల వయసులో లక్ష్మి ఢిల్లీ బస్ స్టాప్ వద్ద ఉండగా ఆమెపై యాసిడ్ దాడి జరిగింది. లక్ష్మి సోదరుడికి స్నేహితుడైన వ్యక్తే, తన ప్రేమను నిరాకరించిందన్న కోపంతో ఈ దారుణానికి పాల్పడ్డాడు. అనంతరం ఆమె ఈ తరహా దాడులకు వ్యతిరేకంగా ఉద్యమాలు నడిపి అలుపెరగని పోరాటం చేశారు.
