విభజన అత్యంత బాధాకరమైన విషయం: శైలజానాథ్

రాష్ట్ర విభజన అత్యంత బాధాకరమైన విషయమని మంత్రి శైలజానాథ్ అన్నారు. విభజన ప్రక్రియలో రాష్ట్ర అసెంబ్లీ అభిప్రాయం తీసుకోవాల్సిందేనని డిమాండ్ చేసిన ఆయన, విభజనకు సంబంధించిన బిల్లు అసెంబ్లీకి ఏ రూపంలో వచ్చినా వ్యతిరేకిస్తామని స్పష్టం చేశారు. అసెంబ్లీలో రాష్ట్ర విభజనను కాంగ్రెస్ సభ్యులు ఎట్టి పరిస్థితుల్లోనూ వ్యతిరేకించాల్సిందే నన్నారు. చరిత్రలో ఏ రాష్ట్ర ఏర్పాటు అసెంబ్లీ తీర్మానం లేకుండా జరగలేదని శైలజానాథ్ పేర్కొన్నారు.

ఈ సందర్భంగా వైఎస్సార్సీపీపై మండిపడిన మంత్రి.. తెలంగాణపై ఇడుపులపాయలో చేసిన ప్రమాణం జగన్ కు గుర్తు లేదా? అని ప్రశ్నించారు. రాష్ట్ర విభజన ఎక్కడ జరిగిందో ఆంధ్రప్రదేశ్ ప్రజలకు తెలుసునన్నారు. ఆర్టికల్ 3 ప్రకారం రాష్ట్ర్రాన్ని విభజించమన్న వారు ఇప్పుడెందుకు దీక్షలకు దిగుతున్నారని నిలదీశారు. 'విభజనపై అసలు మీ అభిప్రాయమేంటో చెప్పాలని' శైలజానాథ్ వైయస్సార్ సీపీని డిమాండ్ చేశారు. బయటొకటి, లోపలొకటి పెట్టుకుని ప్రవర్తించడం చాలా బాధాకరంగా ఉందని ఆవేదన వ్యక్తం చేశారు.