యూనిసెఫ్ లేఖపై స్పందించిన ఏపీ గవర్నర్ బిశ్వ భూషణ్ హరిచందన్
- కరోనాపై పోరుకు ఆంధ్రప్రదేశ్ రెడ్ క్రాస్ సొసైటీ, యూనిసెఫ్ మధ్య అవగాహన
ప్రస్తుత విపత్కర పరిస్ధితుల నేపథ్యంలో కాలపరిమితితో కూడిన కార్యక్రమాల రూపకల్పన జరగాలన్నారు. విశ్వ వ్యాప్తంగా కరోనా మహమ్మారి అంతకంతకూ విజృంభిస్తున్న తరుణంలో ఆంధ్రప్రదేశ్ రెడ్ క్రాస్ సొసైటీతో కలిసి పని చేసేందుకు తాము సిద్దంగా ఉన్నామని, అనుమతిని మంజూరు చేయాలని యూనిసెఫ్ రాసిన లేఖకు గవర్నర్ వెంటనే స్పందించారు.
ఆంధ్రప్రదేశ్, కర్ణాటక, తెలంగాణ రాష్ట్రాలకు ప్రాతినిధ్యం వహిస్తున్న యునిసెఫ్ క్షేత్ర కార్యాలయ ముఖ్య ప్రతినిధి మీటల్ రుస్డియా రెడ్ క్రాస్ తో సంయుక్త భాగస్వామ్యాన్ని ఆకాంక్షిస్తూ ముందస్తుగా తమ సంసిద్ధతను వ్యక్తపరచగా, గవర్నర్ వెంటనే తదనుగుణ కార్యాచరణను వేగవంతం చేశారు. ఈ రెండు సంస్ధల భాగస్వామ్యం ఫలితంగా ఆంధ్రప్రదేశ్ లో కరోనా నివారణ చర్యలు కొత్త రూపును సంతరించుకోనున్నాయి.
యునిసెఫ్ ఈ కార్యక్రమంలో భాగంగా రెడ్‌క్రాస్ వాలంటీర్ల కోసం ప్రత్యేక శిక్షణా కార్యక్రమాలను చేపట్టి వారిలో సామర్ధ్య పెంపుకు దోహదం చేస్తుంది. పిల్లల రక్షణ, నీటి వినియోగం, పారిశుధ్యం, పరిశుభ్రత కార్యకలాపాలకు సంబంధించి పాఠశాలల స్దాయిలో కార్యక్రమాలు నిర్వహిస్తుంది. మహిళాభివృద్ది శిశు సంక్షేమ శాఖ ద్వారా చిన్నారులలో రోగ నిరోధకతను పెంపొందించటంతో పాటు పిల్లల అభివృద్ధి, ఆరోగ్య అవగాహన వంటి వాటిపై లోతైన అవగాహన కల్పిస్తారు.
శ్వాసకోశ పరమైన అంశాలపై పూర్తి స్దాయి అవగాహనకు మార్గం కల్పిస్తూ భౌతిక దూరం సాధనపై ప్రత్యేక దృష్టి నిలుపుతారు. కరోనాను ఎదుర్కోవటంలో ముందు వరసలో ఉండి పని చేస్తున్న పారిశుధ్య కార్మికుల సంరక్షణ, వారి వల్ల ప్రభావితమైన వ్యక్తులు, కుటుంబాల ప్రయోజనం కోసం కూడా ఈ రెండు సంస్ధల భాగస్వామ్యం తోడ్పడుతుందని గవర్నర్ కార్యదర్శి ముఖేష్ కుమార్ మీనా ఈ సందర్భంగా తెలిపారు.
ఆంధ్రప్రదేశ్, కర్ణాటక, తెలంగాణ రాష్ట్రాలకు సంబంధించి హైదరాబాద్‌ కేంద్రంగా సేవలు అందిస్తున్న యునిసెఫ్ క్షేత్ర కార్యాలయ బాధ్యుడు మీటల్ రుస్డియా ఈ సంయుక్త భాగస్వామ్యం కోసం చొరవ తీసుకోవటం ప్రశంసనీయమన్నారు. తక్షణమే పూర్తి స్ధాయి రోడ్ మ్యాప్ తయారు చేసేలా గవర్నర్ బిశ్వ భూషన్ రెడ్ క్రాస్ అధ్యక్ష, కార్యదర్శులకు ఆదేశాలు జారీ చేశారన్నారు. ఆంధ్రప్రదేశ్ రెడ్ క్రాస్ సొసైటీ గవర్నర్ నేతృత్వంలో ఇప్పటికే విభిన్న రకాల సేవలు అందిస్తుందని, కరోనాపై పోరులో కూడా తనదైన పాత్రను పోషించనుందని మీనా వివరించారు.