విజయవాడలో కారు దగ్ధం.. నలుగురి మృతిపై దిగ్భ్రాంతి వ్యక్తం చేసిన చంద్రబాబు, పవన్, లోకేశ్

విజయవాడ నగర శివార్లలోని వెస్ట్ బైపాస్ రోడ్డుపై ఘోర ప్రమాదం చోటుచేసుకోవడం తెలిసిందే. ఓ ఎలక్ట్రిక్ కారులో అకస్మాత్తుగా మంటలు చెలరేగి, అందులో ప్రయాణిస్తున్న నలుగురు వ్యక్తులు సజీవ దహనమయ్యారు. ఈ తీవ్ర విషాద ఘటనలో మరొకరు తీవ్ర గాయాలతో బయటపడ్డారు.

ఈ దుర్ఘటనపై ముఖ్యమంత్రి చంద్రబాబు తీవ్ర దిగ్భ్రాంతి వ్యక్తం చేశారు. మృతుల కుటుంబాలకు తన ప్రగాఢ సానుభూతిని తెలియజేశారు. ప్రమాదంలో గాయపడిన వ్యక్తికి సాధ్యమైనంత ఉత్తమమైన వైద్య సేవలు అందించాలని అధికారులను ఆయన ఆదేశించారు. ప్రమాదానికి గల కారణాలను అడిగి తెలుసుకున్నారు.

ఉప ముఖ్యమంత్రి పవన్ కల్యాణ్, విద్యా శాఖ మంత్రి నారా లోకేశ్ కూడా ఈ ఘటనపై తీవ్ర విచారం వ్యక్తం చేశారు. మృతుల ఆత్మకు శాంతి చేకూరాలని ప్రార్థిస్తూ, వారి కుటుంబ సభ్యులకు సానుభూతి ప్రకటించారు. క్షతగాత్రుడికి మెరుగైన చికిత్స అందేలా చూడాలని అధికారులకు దిశానిర్దేశం చేశారు. ముఖ్యంగా ఎలక్ట్రిక్ వాహనంలో మంటలు చెలరేగడానికి గల సాంకేతిక కారణాలపై దృష్టి సారించాలని పవన్ కల్యాణ్ అధికారులను కోరారు.

"విజయవాడ వెస్ట్ బైపాస్ లో జరిగిన రోడ్డు ప్రమాదంలో నలుగురు వ్యక్తులు చనిపోవడం తీవ్రంగా కలచివేసింది. మృతుల‌కు నివాళులు అర్పిస్తున్నాను. క్షతగాత్రులకు మెరుగైన వైద్యం అందించేందుకు అవసరమైన చర్యలు తీసుకోవాలని అధికారులను ఆదేశించాం. మృతుల కుటుంబ సభ్యులకు నా ప్రగాఢ సానుభూతిని తెలియజేస్తున్నాను" అని నారా లోకేశ్ పేర్కొన్నారు.

ప్రమాదంపై పోలీసులు కేసు నమోదు చేసి దర్యాప్తు చేపట్టారు. రెయిలింగ్‌ను ఢీకొన్న వెంటనే కారు లాక్ అయి, మంటలు వేగంగా వ్యాపించడంతో లోపల ఉన్నవారు బయటకు రాలేకపోయారని తెలుస్తోంది. ఈ విషాద ఘటన స్థానికంగా తీవ్ర కలకలం రేపింది.