'రామాయణం' ట్రైలర్‌పై శివసేన మాజీ ఎంపీ ప్రియాంక చతుర్వేది ఆగ్రహం

బాలీవుడ్‌లో అత్యంత ప్రతిష్ఠాత్మకంగా రూపొందుతున్న 'రామాయణం' చిత్ర ట్రైలర్‌పై శివసేన (యూబీటీ) నాయకురాలు, మాజీ రాజ్యసభ ఎంపీ ప్రియాంక చతుర్వేది విమర్శలు గుప్పించారు. చిత్రంలో నటీనటుల ఎంపిక (క్యాస్టింగ్), విజువల్ ఎఫెక్ట్స్ (వీఎఫ్ఎక్స్), నటన, వస్త్రధారణ, సంగీతం వంటి ఏ అంశం కూడా ఆకట్టుకునేలా లేదంటూ ఆమె తీవ్ర అసంతృప్తి వ్యక్తం చేశారు.

ఈ మేరకు శుక్రవారం ఆమె 'ఎక్స్' వేదికగా స్పందిస్తూ.. "'రామాయణం' టీజర్‌ను ఇప్పటివరకు ఎందుకు ఇంత రహస్యంగా ఉంచారో ఇప్పుడు అర్థమవుతోంది. చిత్రంపై నెలకొన్న భారీ అంచనాలకు ఇది ఏమాత్రం తగినట్లుగా లేదు. సరిగ్గా లేని నటీనటుల ఎంపిక, వీఎఫ్ఎక్స్, నటన, వింతగా ఉన్న వస్త్రధారణ, ఇంకా మెరుగ్గా ఉండాల్సిన సంగీతం.. ఇలా ఏదీ మెప్పించేలా లేదు. దూరదర్శన్ 'రామాయణం' ఎప్పటికీ అజరామరంగా నిలిచిపోతుంది" అని తన పోస్ట్‌లో పేర్కొన్నారు.

నితేష్ తివారీ దర్శకత్వంలో రెండు భాగాలుగా తెరకెక్కుతున్న ఈ చిత్ర టీజర్‌ను గురువారం బ్రహ్మ ముహూర్తంలో విడుదల చేశారు. ఇందులో రాముడిగా రణ్‌బీర్ కపూర్, సీతగా సాయి పల్లవి, రావణుడిగా యశ్ నటిస్తున్నారు. నమిత్ మల్హోత్రాకు చెందిన ప్రైమ్ ఫోకస్ స్టూడియోస్ నిర్మిస్తున్న ఈ చిత్రాన్ని 2026 నవంబర్ 8న దీపావళి కానుకగా విడుదల చేయనున్నారు. అయితే, హనుమంతుడి పాత్ర పోషిస్తున్న సన్నీ డియోల్ ఈ టీజర్‌లో ఎక్కడా కనిపించకపోవడం గమనార్హం.

ప్రస్తుతం ఈ టీజర్‌పై సామాజిక మాధ్యమాల్లో మిశ్రమ స్పందనలు వ్యక్తమవుతున్నాయి. చిత్ర నిర్మాణ విలువలు, రావణుడిగా యశ్ ఆహార్యం, విజువల్స్‌ను కొందరు నెటిజన్లు ప్రశంసిస్తుండగా, మరికొందరు మాత్రం సన్నివేశాల్లో భావోద్వేగాలు కొరవడ్డాయని, కొన్ని పాత్రల ఎంపికతో పాటు ఆధునిక శైలిలో ఉన్న స్టైలింగ్ ఏమాత్రం బాగోలేదని విమర్శిస్తున్నారు.