జానకి గారి మృతి దిగ్భ్రాంతికి గురిచేసింది: బాలకృష్ణ

ప్రముఖ గాయని, గాన కోకిల ఎస్. జానకి మృతి పట్ల హిందూపురం ఎమ్మెల్యే, సినీ నటుడు నందమూరి బాలకృష్ణ తీవ్ర దిగ్భ్రాంతి వ్యక్తం చేశారు. ఆమె ఇక లేరన్న వార్త తనను తీవ్రంగా కలచివేసిందని అన్నారు. దశాబ్దాల పాటు తన మధురమైన గళంతో కోట్లాది మంది సంగీతాభిమానులను అలరించిన జానకి మరణం భారత చలనచిత్ర పరిశ్రమకు తీరని లోటని బాలకృష్ణ ఆవేదన వ్యక్తం చేశారు.

ఈ సందర్భంగా తమ కుటుంబంతో జానకికి ఉన్న అనుబంధాన్ని ఆయన గుర్తుచేసుకున్నారు. "మా నాన్నగారు, స్వర్గీయ నందమూరి తారకరామారావు గారి చిత్రాలతో పాటు, నా చిత్రాలలోనూ ఆమె ఎన్నో అమర గీతాలు పాడారు. ఆ పాటలు ఎప్పటికీ ప్రజాదరణ పొందుతూనే ఉంటాయి. మా కుటుంబంతో ఆమెకు దశాబ్దాల అనుబంధం ఉంది" అని బాలకృష్ణ పేర్కొన్నారు.

భారతీయ సంగీత ప్రపంచంలో తన అద్భుతమైన గాత్రంతో చెరగని ముద్ర వేసిన జానకి పవిత్ర ఆత్మకు శాంతి చేకూరాలని భగవంతుడిని ప్రార్థిస్తున్నట్లు తెలిపారు. ఆమె కుటుంబ సభ్యులకు, అసంఖ్యాక అభిమానులకు తన ప్రగాఢ సానుభూతిని తెలియజేస్తూ "ఓం శాంతి!" అని బాలకృష్ణ తన ప్రకటనను ముగించారు.