తిరుమల కొండపై భారీ రద్దీ... శ్రీవారి దర్శనానికి 18 గంటల సమయం

తిరుమల శ్రీవారి దర్శనానికి భక్తులు పోటెత్తారు. వారాంతపు సెలవులు కావడంతో కొండపై భారీ రద్దీ నెలకొంది. టోకెన్లు లేని భక్తులకు శ్రీవారి సర్వదర్శనానికి సుమారు 18 గంటల సమయం పడుతోందని అధికారులు తెలిపారు. వైకుంఠం క్యూ కాంప్లెక్స్‌లోని అన్ని కంపార్ట్‌మెంట్లు, నారాయణగిరి షెడ్లు పూర్తిగా నిండిపోయాయి. దీంతో భక్తుల క్యూ లైన్లు గోగర్భం డ్యామ్ సమీపంలోని ఆక్టోపస్ భవనం వరకు చేరాయి.

భక్తుల రద్దీని దృష్టిలో ఉంచుకుని టీటీడీ అధికారులు ప్రత్యేక ఏర్పాట్లు చేస్తున్నారు. క్యూ లైన్లలో గంటల తరబడి వేచి ఉన్న భక్తులకు ఎలాంటి అసౌకర్యం కలగకుండా టీటీడీ సిబ్బంది, శ్రీవారి సేవకులు అల్పాహారం, తాగునీరు, పాలను అందిస్తున్నారు. రద్దీని కొంతమేర తగ్గించేందుకు మధ్యాహ్నం జారీ చేయాల్సిన టైమ్-స్లాట్ టోకెన్లను రెండు గంటల ముందే విడుదల చేశారు. తిరుపతిలోని భూదేవి కాంప్లెక్స్, శ్రీనివాసం, విష్ణునివాసం వద్ద కూడా టోకెన్ల కోసం భక్తులు బారులు తీరిన దృశ్యాలు కనిపించాయి.

కాగా, శుక్రవారం (జూన్ 26) నాడు 81,340 మంది భక్తులు శ్రీవారిని దర్శించుకున్నారు. 44,874 మంది తలనీలాలు సమర్పించారు. హుండీ ద్వారా రూ. 3.76 కోట్ల ఆదాయం లభించినట్లు టీటీడీ వెల్లడించింది. వారాంతం కావడంతో రద్దీ మరింత పెరిగే అవకాశం ఉందని అధికారులు అంచనా వేస్తున్నారు.