హెలికాప్టర్ సాక్షిగా లవ్ ప్రపోజల్.. నెట్టింట వైరల్ అయిన ఆర్మీ కెప్టెన్పై క్రమశిక్షణ చర్యలు?
- శిక్షణ పూర్తి చేసుకుని పైలట్గా మారిన కెప్టెన్ భరత్ భరద్వాజ్
- నాసిక్ ఆర్మీ స్కూల్ వేడుకలో కాబోయే భార్యకు రింగ్ తొడిగిన ఆఫీసర్
- సోషల్ మీడియాలో విపరీతంగా వైరల్ అయిన హెలికాప్టర్ ప్రపోజల్ వీడియో
- అధికారిక వేడుకలో వ్యక్తిగత సంబరాలపై ఆర్మీ ఉన్నతాధికారుల అసంతృప్తి
- మిలిటరీ ప్రొటోకాల్, నిబంధనల ఉల్లంఘన కింద షోకాజ్ నోటీసులు ఇచ్చే అవకాశం
నాసిక్లోని కాంబాట్ ఆర్మీ ఏవియేషన్ ట్రైనింగ్ స్కూల్ (CAATS)లో ట్రైనీ పైలట్ల శిక్షణ ముగింపు సందర్భంగా ఇటీవల పాసింగ్ అవుట్ పరేడ్, కాన్వొకేషన్ వేడుక ఘనంగా జరిగింది. ఈ అధికారిక కార్యక్రమం ముగిసిన వెంటనే కెప్టెన్ భరత్ భరద్వాజ్ తన కాబోయే భార్య ఆరుషిని అక్కడ నిలిపి ఉంచిన ఒక ఆర్మీ హెలికాప్టర్ వైపు తీసుకువెళ్లారు. అక్కడ ఉన్న కుటుంబ సభ్యులు, తోటి అధికారులు చూస్తుండగానే, ఆయన మోకాళ్లపై కూర్చుని సినిమా స్టైల్లో ఆమెకు రింగ్ ప్రెజెంట్ చేస్తూ ప్రపోజ్ చేశారు. ఆరుషి సంతోషంతో ఆ ప్రపోజల్ను అంగీకరించగా, అక్కడ ఉన్నవారంతా చప్పట్లతో వారిని అభినందించారు.
ఈ అపూర్వ క్షణాలకు సంబంధించిన వీడియోలు, ఫోటోలు సోషల్ మీడియాలో ప్రత్యక్షమవ్వడంతో అవి కాస్తా విపరీతంగా వైరల్ అయ్యాయి. వృత్తిపరమైన విజయంతో పాటు వ్యక్తిగత జీవితంలోనూ ఒకేసారి కొత్త అడుగు వేయడం అద్భుతమంటూ నెటిజన్లు ఆ యువ జంటపై ప్రశంసల జల్లు కురిపించారు. దేశ సేవ, సొంత జీవితం రెండూ ఒకే వేదికపై ముడిపడటం అరుదైన విషయమని, ఆర్మీలోని గంభీరమైన వాతావరణం కాస్తా ఒకేసారి పండగలా మారిపోయిందని పలువురు కామెంట్లు చేశారు.
అయితే, ఆన్లైన్లో వెల్లువెత్తిన ప్రశంసలు ఇలా ఉంటే.. ఆర్మీ అధికారులు మాత్రం ఈ వ్యవహారాన్ని చాలా సీరియస్గా తీసుకున్నారు. అత్యంత ప్రతిష్ఠాత్మకమైన అధికారిక సైనిక వేడుక ముగిసిన వెంటనే, దేశ రక్షణకు సంబంధించిన అధికారిక సైనిక పరికరాలు (హెలికాప్టర్), రక్షిత ప్రాంతాల (Premises) పరిధిలో ఇలాంటి వ్యక్తిగత వేడుకలు జరపడం మిలిటరీ నిబంధనలకు విరుద్ధమని అధికారులు భావిస్తున్నారు. సైన్యంలో క్రమశిక్షణ, ప్రొటోకాల్ అత్యంత ముఖ్యమైనవని, కాబట్టి దీనిపై వివరణ కోరుతూ సదరు కెప్టెన్కు నోటీసులు ఇవ్వనున్నట్లు రక్షణ వర్గాల సమాచారం. కాగా, ఈ విషయంపై ఆర్మీ ఇంకా ఎలాంటి అధికారిక బహిరంగ ప్రకటన చేయలేదు.
