ఏఐతో ఉద్యోగ గండం.. 18 నెలల్లో లక్షల కొలువుల మాయం!

కృత్రిమ మేధ (AI) సాంకేతికత శరవేగంగా విస్తరిస్తున్న నేపథ్యంలో అమెరికాలో రాబోయే 12 నుంచి 18 నెలల్లో లక్షలాది వైట్ కాలర్ ఉద్యోగాలు ప్రమాదంలో పడనున్నాయని మాజీ డెమోక్రాటిక్ అధ్యక్ష అభ్యర్థి, వ్యాపారవేత్త ఆండ్రూ యాంగ్ సంచలన హెచ్చరికలు జారీ చేశారు. ఏఐ ప్రోగ్రామ్‌లు నిమిషాల్లో పూర్తి చేస్తున్న పనులకు గతంలో డిజైనర్లకు రోజుల సమయం పట్టేదని, ఈ మార్పు ఉద్యోగ విపత్తుకు సంకేతమని ఆయన ఆందోళన వ్యక్తం చేశారు.

ఆండ్రూ యాంగ్ విశ్లేషణ ప్రకారం కాల్ సెంటర్ సిబ్బంది, మార్కెటింగ్ నిపుణులు, కోడర్లు, డేటా అనలిస్టులు చేసే పనులను ఏఐ ఇప్పుడు సులభంగా పూర్తి చేస్తోంది. కేవలం సమాచారాన్ని విశ్లేషించి నివేదికలు ఇచ్చే సీనియర్ స్థాయి ఉద్యోగుల అవసరం కూడా భవిష్యత్తులో తగ్గిపోతుందని ఆయన అభిప్రాయపడ్డారు. ఒక సంస్థ ఖర్చులను తగ్గించుకోవడానికి ఏఐని వాడి సిబ్బందిని తొలగిస్తే, పోటీలో నిలబడటానికి మిగతా సంస్థలు కూడా అదే మార్గాన్ని అనుసరించక తప్పదని ఆయన విశ్లేషించారు. సిబ్బందిని తగ్గించి లాభాలు పెంచుకునే కంపెనీలకే స్టాక్ మార్కెట్ పెద్దపీట వేయడం కూడా ఈ ధోరణికి కారణమవుతోందని తెలిపారు.

ఈ పరిణామాల వల్ల అమెరికాలోని దాదాపు 7 కోట్ల వైట్ కాలర్ ఉద్యోగాల్లో 20 శాతం నుంచి 50 శాతం వరకు రాబోయే కొన్నేళ్లలో కనుమరుగయ్యే ప్రమాదం ఉందని యాంగ్ హెచ్చరించారు. ఉద్యోగాల కోత ప్రజల కొనుగోలు శక్తిని దెబ్బతీసి, రియల్ ఎస్టేట్ రంగంపై ప్రతికూల ప్రభావం చూపుతుందని, ఇది స్థానిక ఆర్థిక వ్యవస్థలను కుంగదీస్తుందని అన్నారు. దీనికి పరిష్కారంగా 'యూనివర్సల్ బేసిక్ ఇన్కమ్' (UBI) పథకాన్ని అమలు చేయాలని, ఏఐ కంపెనీలపై అదనపు పన్నులు విధించి ఆ నిధులతో ఉపాధి కోల్పోయిన వారికి శిక్షణ ఇవ్వాలని సూచించారు.

ఈ హెచ్చరికలకు బలం చేకూరుస్తూ ఇప్పటికే అమెజాన్, గూగుల్, మైక్రోసాఫ్ట్ వంటి దిగ్గజ సంస్థలు తమ కార్యకలాపాల్లో ఏఐ వినియోగాన్ని పెంచి వేలాది మంది ఉద్యోగులను తొలగించడం ప్రారంభించాయి. 2026 చివరి నాటికి ఏఐ ఆధారిత ఆటోమేషన్ వల్ల ప్రపంచ టెక్నాలజీ ఉపాధి రంగంలో భారీ మార్పులు రావడం ఖాయమని నిపుణులు అంచనా వేస్తున్నారు.