Team India: సౌతాఫ్రికా చేతిలో చిత్తు.. డబ్ల్యూటీసీ పట్టికలో మరింత పతనమైన టీమిండియా ర్యాంక్

దక్షిణాఫ్రికాతో జరిగిన రెండు టెస్టుల సిరీస్‌లో టీమిండియా ఘోర పరాభవాన్ని చవిచూసింది. 0-2 తేడాతో సిరీస్‌ను కోల్పోయింది. గౌహతి వేదికగా జరిగిన రెండో టెస్టులో ఏమాత్రం పోటీ ఇవ్వలేకపోయిన భారత్, టెస్టు క్రికెట్ చరిత్రలోనే తన అతిపెద్ద ఓటమిని నమోదు చేసింది. ఈ ఓటమి ప్రభావం ప్రపంచ టెస్టు ఛాంపియన్‌షిప్ (డబ్ల్యూటీసీ) 2025-27 పాయింట్ల పట్టికపైనా పడింది.

ఈ మ్యాచ్‌లో 549 పరుగుల భారీ లక్ష్యఛేదనతో బరిలోకి దిగిన భారత జట్టు, కనీసం డ్రా చేసుకునేందుకు కూడా పోరాడలేకపోయింది. తొలి ఇన్నింగ్స్‌లో 201 పరుగులకు ఆలౌటైన టీమిండియా, రెండో ఇన్నింగ్స్‌లో కేవలం 140 పరుగులకే కుప్పకూలింది. భారత బ్యాటర్లు దక్షిణాఫ్రికా బౌలర్ల ధాటికి క్రీజులో నిలవలేకపోయారు.

ఈ ఓటమితో డబ్ల్యూటీసీ ర్యాంకింగ్స్‌లో భారత్ నాలుగో స్థానం నుంచి ఐదో స్థానానికి (48.15 శాతం) పడిపోయింది. ఈ సైకిల్‌లో ఇప్పటివరకు 9 మ్యాచ్‌లు ఆడిన భారత్.. నాలుగింటిలో గెలిచి, మరో నాలుగింటిలో ఓటమిపాలైంది. ఒక మ్యాచ్ డ్రాగా ముగిసింది.

మరోవైపు, ఈ విజయంతో దక్షిణాఫ్రికా తన విజయాల శాతాన్ని 75.00కు పెంచుకున్నా, రెండో స్థానంలోనే కొనసాగుతోంది. ఆడిన నాలుగు మ్యాచ్‌ల్లోనూ గెలిచిన ఆస్ట్రేలియా అగ్రస్థానంలో నిలిచింది. శ్రీలంక (66.67%), పాకిస్థాన్ (50.00%) వరుసగా మూడు, నాలుగు స్థానాల్లో ఉన్నాయి. భారత్ తర్వాతి స్థానాల్లో ఇంగ్లండ్, బంగ్లాదేశ్, వెస్టిండీస్ ఉన్నాయి.