పింగళి వెంకయ్య వర్ధంతి.. సీఎం చంద్రబాబు, లోకేశ్ నివాళులు
- జాతీయ పతాక రూపకర్త పింగళికి సీఎం, మంత్రి నివాళి
- పింగళి వర్ధంతి సందర్భంగా ఆయన సేవలను స్మరించుకున్న చంద్రబాబు
- పింగళి తెలుగువారు కావడం మనకు గర్వకారణమన్న లోకేశ్
- స్వామి వివేకానంద వర్ధంతికి నివాళులర్పించిన ముఖ్యమంత్రి
- యువతకు వివేకానందుడు గొప్ప స్ఫూర్తి అని కొనియాడిన సీఎం
భారత దేశ ఆత్మగౌరవానికి ప్రతీక అయిన జాతీయ జెండాను రూపొందించిన పింగళి వెంకయ్య గొప్ప దేశభక్తుడని ముఖ్యమంత్రి చంద్రబాబు కొనియాడారు. పింగళి నిస్వార్థ సేవలను ఈ సందర్భంగా గుర్తుచేసుకోవాలని ఆయన పిలుపునిచ్చారు. మంత్రి నారా లోకేశ్ స్పందిస్తూ, పింగళి వెంకయ్య తెలుగువారు కావడం మనందరికీ గర్వకారణమని పేర్కొన్నారు. భారత జాతికి ఆయన అందించిన సేవలు ఎనలేనివని అన్నారు.
అలాగే, స్వామి వివేకానంద వర్ధంతి సందర్భంగా సీఎం చంద్రబాబు ఆయనకు నివాళులు అర్పించారు. కేవలం కొద్దికాలంలోనే భారతీయ సంస్కృతి, ఆధ్యాత్మికత గొప్పదనాన్ని ప్రపంచానికి చాటిచెప్పారని గుర్తుచేశారు. యువతలో స్ఫూర్తి నింపే ఆయన బోధనలు ఎప్పటికీ ఆదర్శనీయమని చంద్రబాబు తన సందేశంలో పేర్కొన్నారు.
