అశ్విన్ ఖాతాలో మరో రికార్డు

టీమిండియా సీనియర్ ఆఫ్ స్పిన్నర్ రవిచంద్రన్ అశ్విన్ విశాఖ టెస్టు ద్వారా మరో రికార్డును తన ఖాతాలో వేసుకున్నాడు. అశ్విన్ ఇంగ్లండ్ పై రెండో ఇన్నింగ్స్ లో 3 వికెట్లు తీశాడు. ఇప్పటివరకు టెస్టుల్లో ఇంగ్లండ్ పై అశ్విన్ 96 వికెట్లు పడగొట్టాడు. తద్వారా ఇంగ్లండ్ పై అత్యధిక వికెట్లు తీసిన భారత బౌలర్ గా రికార్డు పుటల్లో కెక్కాడు. 

గతంలో ఈ రికార్డు స్పిన్ దిగ్గజం బీఎస్ చంద్రశేఖర్ పేరిట ఉంది. చంద్రశేఖర్ ఇంగ్లండ్ పై 95 వికెట్లు తీశాడు. ఇప్పుడా రికార్డును అశ్విన్ అధిగమించాడు. ఈ జాబితాలో అనిల్ కుంబ్లే 92, బిషన్ సింగ్ బేడీ 85, కపిల్ దేవ్ 85, ఇషాంత్ శర్మ 67 వికెట్లతో తర్వాత స్థానాల్లో ఉన్నారు. 

కాగా, అశ్విన్ విశాఖ టెస్టులో తీసిన 3 వికెట్లతో టెస్టుల్లో అతడి మొత్తం వికెట్ల సంఖ్య 499కి చేరింది. మరొక్క వికెట్ పడగొడితే అశ్విన్ 500 వికెట్ల మార్కును అందుకుంటాడు. కెరీర్ లో ఇప్పటివరకు అశ్విన్ 97 టెస్టులు ఆడాడు. వికెట్ల సగటు 23.92 కాగా... 34 సార్లు 5 వికెట్ల ప్రదర్శన నమోదు చేశాడు.