మహారాష్ట్రలో డిప్యూటీ సీఎం సమక్షంలో పోలీసు అధికారిని చెంపదెబ్బ కొట్టిన బీజేపీ ఎమ్మెల్యే

మహారాష్ట్రలోని పూణేలో శుక్రవారం షాకింగ్ ఘటన వెలుగుచూసింది. నగరంలోని సాసూన్ హాస్పిటల్‌లో జరిగిన కార్యక్రమంలో డిప్యూటీ సీఎం అజిత్ పవార్ సమక్షంలో బీజేపీ ఎమ్మెల్యే సునీల్ కాంబ్లే దురుసుగా ప్రవర్తించారు. పోలీసు సిబ్బందిలోని ఓ అధికారిపై ఆయన చేయిచేసుకున్నారు. సహనం కోల్పోయి చెంపదెబ్బ కొట్టారు. ఇందుకు సంబంధించిన వీడియో సోషల్ మీడియాలో వైరల్‌గా మారింది. కార్యక్రమం ముగిసిన తర్వాత సునీల్ కాంబ్లే వేదిక నుంచి బయలుదేరిన సమయంలో ఈ ఘటన జరిగింది. వేదిక దిగుతున్న క్రమంలో నిలబడి ఉన్న పోలీసు సిబ్బందిపై కోపంతో ఉద్దేశపూర్వకంగా చెంపదెబ్బ కొట్టడం వీడియోలో స్పష్టంగా కనిపించింది. ఈ ఘటన జరిగిన సమయంలో డిప్యూటీ సీఎం అజిత్ పవార్ వేదికపైనే ఉన్నారు.