Wasim Akram: ఏరియల్ తో ఉతికితే నిజంగానే బట్టల మురికిపోతుందా? అంటూ వసీమ్ అక్రమ్ ను ప్రశ్నించిన అభిమాని

పాక్ క్రికెట్ లెజెండ్ వసీమ్ అక్రమ్ టీ20 వరల్డ్ కప్ నేపథ్యంలో ఇతర మాజీలతో కలిసి ఓ టీవీ లైవ్ లో పాల్గొన్నాడు. అక్రమ్ తో పాటు వకార్ యూనిస్, మిస్బావుల్ హక్ కూడా ఈ చర్చా కార్యక్రమంలో పాల్గొన్నారు. ఈ సందర్భంగా ఆ మాజీ క్రికెటర్లకు అభిమానులు పలు ప్రశ్నలను పంపించారు. ఓ అభిమాని అక్రమ్ కు పంపిన ప్రశ్నను వకార్ యూనిస్ చదివి వినిపించాడు. 

వకార్ యూనిస్: ఇది చాలా ముఖ్యమైన ప్రశ్న!
వసీమ్ అక్రమ్: అంత ముఖ్యమైనదా...?
వకార్ యూనిస్: చాలా ముఖ్యమైనది. ఈ ప్రశ్న నీకే. ఇంతకీ ఆ ప్రశ్న ఏంటంటే... ఏరియల్ తో ఉతికితే నిజంగానే బట్టల మురికిపోతుందా?
వసీమ్ అక్రమ్: గత 10 ఏళ్లుగా నేను ఏరియల్ తోనే బట్టలు ఉతుకుతున్నాను. ఇప్పుడు నా వయసు 56 ఏళ్లు. ఏరియల్ తో ఉతికితే బట్టల మురికిపోతుందని కచ్చితంగా చెప్పగలను. ఏరియల్... ఏరియల్.
వకార్ యూనిస్: ఇవును, ఇది చాలా ముఖ్యమైన విషయం. నేను కూడా ఈ విషయం అడగాలనుకున్నాను.
టీవీ చానల్ యాంకర్:  అయితే వసీం అక్రమ్ మన నేషనల్ ధోబీ (బట్టలు ఉతికే వ్యక్తి) అన్నమాట!
కాగా, దీనికి సంబంధించిన వీడియో సోషల్ మీడియాలో సందడి చేస్తోంది.