Koti: ఆ సంఘటనే నన్ను మెగాస్టార్ కి దూరం చేసింది: కోటి

ఒకప్పుడు చిరంజీవి సినిమా అంటే సంగీత దర్శకుడిగా కోటి పేరు కనిపించేది. ఇద్దరి కాంబినేషన్లో ఎన్నో సూపర్ హిట్ సాంగ్స్ వచ్చాయి. 'హిట్లర్' సినిమా కూడా మ్యూజికల్ హిట్ గా నిలిచింది. అయితే ఆ తరువాత మళ్లీ ఈ కాంబినేషన్లో మరో సినిమా రాలేదు. అందుకు కారణమేమిటనేది చాలామందికి తెలియదు కూడా. ఈ విషయం గురించి తాజా ఇంటర్వ్యూలో కోటి చెప్పారు.

"చిరంజీవిగారి 12 సినిమాలకు నేను మ్యూజిక్ డైరెక్టర్ గా పనిచేశాను. ఒక సినిమా 100డేస్ ఫంక్షన్ ను ఒంగోలులో నిర్వహించారు. అక్కడికి దగ్గరలోనే మా అత్తగారి ఊరు. అందువలన ముందురోజునే అక్కడికి చేరుకున్నాను. కానీ హఠాత్తుగా హై ఫీవర్ రావడంతో నేను ఆ ఫంక్షన్ కి వెళ్లలేకపోయాను.

అయితే, కావాలనే నేను ఆ ఫంక్షన్ కి రాలేదని కొంతమంది చిరంజీవిగారికి చెప్పారు. ఆ తరువాత అసలు విషయం ఆయనకి చెప్పడానికి వెళితే, ఆయన మాట్లాడే మూడ్ లో లేరని అన్నారు. ఆయన అలా రియాక్ట్ కావడంలో తప్పులేదనిపించింది. దాంతో వెనక్కి తిరిగి వచ్చేశాను. అలా ఆ సినిమా ఫంక్షన్ ఆయనకి నన్ను దూరం చేసింది" అని చెప్పుకొచ్చారు.