పండగకి సై అంటున్న విశాల్ 'ఎనిమీ'!

విశాల్ - ఆర్య కాంబినేషన్లో 'ఎనిమీ' సినిమా రూపొందింది. ఆనంద్ శంకర్ దర్శకత్వం వహించిన ఈ సినిమాను, తమిళ .. తెలుగు భాషల్లో దసరా పండుగకు విడుదల చేయనున్నారు. ఈ విషయంలో దర్శక నిర్మాతలు క్లారిటీ ఇచ్చేశారు. తెలుగులో దసరా రోజుల్లో గట్టిపోటీ ఉండటం వలన, ఈ సినిమా విడుదల వాయిదా పడుతుందని అంతా అనుకున్నారు. కానీ విజయదశమి రోజున ఈ సినిమాను ప్రేక్షకుల ముందుకు తీసుకు రావడానికి సన్నాహాలు జరుగుతున్నాయి.

ఇద్దరు స్నేహితులు .. బద్ధశత్రువులుగా ఎందుకు మారవలసి వచ్చింది? శత్రువులుగా వాళ్లు ఎలా తలపడ్డారు? చివరికి పాత స్నేహం నిలుస్తుందా? కొత్త శత్రుత్వం గెలుస్తుందా? అనే ఆసక్తికరమైన అంశం చుట్టూ ఈ కథ తిరగనుంది. 'వాడు - వీడు' తరువాత విశాల్ .. ఆర్య కలిసి నటించిన సినిమా ఇది.

మినీ స్టూడియోస్ బ్యానర్ పై వినోద్ కుమార్ నిర్మించిన ఈ సినిమాకి, తమన్ సంగీతాన్ని అందించాడు. విశాల్ జోడిగా 'మృణాళిని రవి' అలరించనుంది. 'గద్దలకొండ గణేశ్' సినిమా ద్వారా ఈ అమ్మాయి ఇక్కడి ప్రేక్షకులకు సుపరిచితమే. ప్రకాశ్ రాజ్ .. మమతా మోహన్ దాస్ కీలకమైన పాత్రలను పోషించారు.