రోహిత్ శర్మ సహా ఐదుగురికీ కరోనా నెగటివ్: బీసీసీఐ

04-01-2021 Mon 10:09
  • న్యూ ఇయర్ సందర్భంగా రెస్టారెంట్‌కు వెళ్లిన భారత ఆటగాళ్లు
  • బయోబబుల్‌ను ఉల్లంఘించారంటూ ఐసోలేషన్‌కు తరలింపు
  • తాజా పరీక్షల్లో ఆటగాళ్లు సహా జట్టు సహాయక సిబ్బందికి నెగటివ్
corona negative for 5 indian cricketers

ఐసోలేషన్‌లో ఉన్న టీమిండియా ఆటగాళ్లు రోహిత్‌శర్మ, శుభ్‌మన్ గిల్, నవ్‌దీప్ సైనీ, రిషభ్ పంత్, పృథ్వీషాలకు నిర్వహించిన కరోనా టెస్టులో నెగటివ్ రిపోర్టులు వచ్చినట్టు బీసీసీఐ తెలిపింది. న్యూ ఇయర్ సందర్భంగా ఇటీవల వీరంతా మెల్‌బోర్న్‌లోని ఓ భారతీయ రెస్టారెంటుకు వెళ్లారు. అక్కడ తమ బిల్లును కట్టిన అభిమానిని రిషభ్ పంత్ కౌగిలించుకున్నట్టు వార్తలు వచ్చాయి. దీంతో అప్రమత్తమైన క్రికెట్ ఆస్ట్రేలియా ఈ ఐదుగురు ఆటగాళ్లను ఐసోలేషన్‌కు పంపింది. అంతేకాక, బయోబబుల్ నిబంధనలు ఉల్లంఘించినట్టు ఆరోపణలు రావడంతో బీసీసీఐ, క్రికెట్ ఆస్ట్రేలియాలు సంయుక్త దర్యాప్తు ప్రారంభించాయి.

ఐసోలేషన్‌లో ఉన్న ఈ ఐదుగురు ఆటగాళ్లకు తాజాగా నిర్వహించిన కరోనా పరీక్షల్లో నెగటివ్ రిపోర్టులు వచ్చినట్టు బీసీసీఐ పేర్కొంది. జట్టు సహాయక సిబ్బందికి కూడా కరోనా నెగటివ్ అనే రిపోర్టులు వచ్చినట్టు వివరించింది. బోర్డర్-గవాస్కర్ ట్రోఫీలో భాగంగా ఈ నెల 7 నుంచి సిడ్నీలో మూడో టెస్టు ప్రారంభం కానుంది. ఇప్పటి వరకు రెండు మ్యాచుల్లో ఇరు జట్లు చెరో మ్యాచ్‌లో గెలిచి సమ ఉజ్జీలుగా ఉన్నాయి.