చంద్రయాన్-2కు ఏడాది... మరో ఏడేళ్లకు సరిపడా ఇంధనం ఉందన్న ఇస్రో!

భారత్ నిర్వహించిన రెండవ లూనార్ మిషన్ గా పేరున్న చంద్రయాన్-2, చంద్రుని కక్ష్యలో ప్రవేశపెట్టబడి గురువారానికి సరిగ్గా సంవత్సరం. గత సంవత్సరం జూలై 22న చంద్రయాన్-2ను లాంచ్ చేయగా, దాన్ని ఆగస్టు 20న చంద్రుడి కక్ష్యలోకి ప్రవేశపెట్టారు. 2019లో ప్రయోగించిన చంద్రయాన్-2, విఫలమైన సంగతి తెలిసిందే. రోవర్ ను కలిగియున్న ల్యాండర్ చంద్రుడి ఉపరితలంపై దిగే క్రమంలో ఇది ఫెయిల్ అయింది.

అయితే, చంద్రయాన్-2లోని ఆర్బిటర్ మాత్రం ఇప్పటికీ విజయవంతంగా పనిచేస్తోంది. దీనిలో 8 రకాల శాస్త్రీయ పరికరాలు ఉన్నాయని, ఇవన్నీ ఇప్పుడూ సక్రమంగానే పనిచేస్తున్నాయని, ఇంతవరకూ చంద్రయాన్-2 ఆర్బిటర్ చంద్రుడి చుట్టూ 4,400 సార్లు పరిభ్రమించిందని ఇస్రో పేర్కొంది.

ఇది చాలా చక్కగా పనిచేస్తోందని, విడిభాగాలన్నీ కూడా సంతృప్తికరంగా పనిచేస్తున్నాయని పేర్కొంది. ఈ ఆర్బిటర్ లో మరో ఏడేళ్లకు సరిపడా ఇంధనం ఉందని, దీని ద్వారా చంద్రునిపై మరింత కాలం పాటు పరిశోధనలు సాగించవచ్చని, ఇప్పటివరకూ ఎవరూ పెద్దగా దృష్టిపెట్టని చంద్రుని దక్షిణ ధ్రువంపై పరిశోధనలు చేస్తున్నామని పేర్కొంది.