పవన్ కల్యాణ్ తో జరిగే భేటీలో ఈ అంశాలపై చర్చిస్తాం: జీవీఎల్

ఏపీలో రాజకీయ వాతావరణం మారిపోయింది. కొత్త సమీకరణలు తెరపైకి వచ్చాయి. జనసేన, బీజేపీలు కలసికట్టుగా ముందుకు సాగనున్నాయి. కాసేపట్లో ఇరు పార్టీల మధ్య కీలక సమావేశం జరగనుంది. ఈ భేటీకి బీజేపీ నుంచి రాష్ట్ర చీఫ్ కన్నా లక్ష్మీనారాయణ, రాష్ట్ర ఇన్చార్జి సునీల్ దేవధర్, రాజ్యసభ సభ్యుడు జీవీఎల్ నరసింహారావు హాజరుకానున్నారు. జనసేన తరపున ఆ పార్టీ అధినేత పవన్ కల్యాణ్, కీలక నేత నాదెండ్ల మనోహర్ హాజరుకాబోతున్నారు.

మరోవైపు ఈ భేటీ నేపథ్యంలో కొందరు బీజేపీ కీలక నేతలు సమావేశమై... భవిష్యత్ కార్యాచరణపై చర్చించారు. ఈ సందర్భంగా జీవీఎల్ నరసింహారావు మాట్లాడుతూ, రానున్న నాలుగేళ్లలో చేపట్టాల్సిన కార్యక్రమాలపై ఇరుపార్టీల భేటీలో చర్చిస్తామని తెలిపారు. కేవలం అమరావతి, స్థానిక సంస్థల ఎన్నికలు మాత్రమే తమ సమావేశ అజెండా కాదని చెప్పారు. రాష్ట్రంలో జరుగుతున్న పరిణామాలు, వ్యూహాలపై చర్చిస్తామని తెలిపారు.