రాహుల్‌ని రాముడిలా చిత్రీకరిస్తూ సోషల్ మీడియాలో కాంగ్రెస్ పోస్టులు

బీహార్ కాంగ్రెస్ తమ పార్టీ అధ్యక్షుడు రాహుల్ గాంధీని రాముడిలా చిత్రీకరిస్తూ సోషల్ మీడియాలో పోస్టర్లు విడుదల చేసింది. పట్నాలో సైతం ఓ పోస్టర్‌ను ఏర్పాటు చేసింది. అయోధ్య రామ జన్మభూమిలో వివాదం లేని 67 ఎకరాల స్థలాన్ని రామ జన్మభూమి న్యాస్ ట్రస్ట్‌కి, ఇతర యజమానులకు ఇచ్చేందుకు అనుమతి కోరుతూ కేంద్రం సుప్రీంకోర్టును ఆశ్రయించింది.

ఈ సమయంలో రాహుల్ రాముడి అవతారంలో దర్శనమివ్వడం ఆసక్తిని రేకెత్తిస్తోంది. దీనిపై బీజేపీ అధికార ప్రతినిధి సంబిత్ పాత్రా మాట్లాడుతూ.. సుప్రీంకోర్టులో కేంద్రం వేసిన పిటీషన్‌పై కాంగ్రెస్ వైఖరిని ప్రశ్నిస్తూ ట్వీట్ చేశారు. ‘రాహుల్.. రాముడిగా మారడం బాగుంది. కానీ ఈ రోజు సుప్రీంకోర్టులో కేంద్రం దాఖలు చేసిన పిటిషన్‌పై కాంగ్రెస్ నేతలు తమ వైఖరేంటో చెబితే ఇంకా బాగుంటుంది’ అని సంబిత్ పాత్ర పేర్కొన్నారు.