బిచ్చగత్తె ఒడిలో అందాల పసిపాప... అసలు విషయాన్ని తేల్చిన పోలీసులు!

ఒక్క ఫొటో ఒక్కోసారి ఎంతటి కంగారు పెట్టిస్తుందో తెలిపే ఉదంతం ఇది. యూఎస్ లో ఉంటున్న ఓ భారత మహిళ చేసిన పని ఓ పేద మహిళకు చిక్కులు తెచ్చిపెట్టడమే కాకుండా పోలీసులను పరుగులు పెట్టించింది. తనకు సామాజిక మాధ్యమంలో వచ్చిన ఓ ఫొటోను ఆ మహిళ షేర్ చేసుకుంటూ, దీని సంగతేంటో తేల్చాలని వ్యాఖ్యానించగా, అది వైరల్ అయింది. ఈ ఫొటోలో ఓ ఆలయం ముందు బిచ్చమెత్తుకుంటున్న ఓ మహిళ ఒడిలో తెల్లగా, అందంగా ఉన్న ఓ పసిపాప ఉంది. జోధ్ పూర్ లోని శనీశ్వరుని ఆలయం వెలుపల రెండు వారాల క్రితం డైపర్ ధరించి ఉన్న ఓ బిడ్డను మాసిపోయిన దుస్తులతో ఉన్న మహిళ ఒడిలో చూసిన ఓ వ్యక్తి ఈ ఫొటో తీశాడు. ఆమె పిల్లల కిడ్నాపరని, పిల్లలను ఎత్తుకుపోయే స్త్రీ అని, పలువురు సామాజిక మాధ్యమాల్లో అనుమానం వ్యక్తం చేస్తూ, ఫొటోను షేర్ చేస్తుండటంతో పోలీసులు రంగంలోకి దిగి నిజాన్ని తేల్చారు.

ఈ ఫొటో వైరల్ అవుతూ ఉండటంతో జరగరానిది జరిగేలోగానే ఆమెను గుర్తించాలని నిర్ణయించిన పోలీసులు, శనీశ్వరుని గుడి ముందు ఆమెను గుర్తించి అరెస్ట్ చేశారు. ఆపై విచారించగా, ఆమె యాచకురాలని, దేవాలయం పొరుగున ఉండే మహిళ ఆ బిడ్డను కాసేపు చూస్తుండమని చెప్పి చేతుల్లో పెట్టి వెళ్లిందని, అంతలోనే ఈ ఫొటోను తీశారని జోధ్ పూర్ డీసీపీ అమన్ దీప్ సింగ్ వెల్లడించారు. పొరుగింటి మహిళను కూడా విచారించామని, బిడ్డ జన్మించిన ఆసుపత్రి రికార్డులను, డైపర్ కొనుగోలు చేసిన దుకాణం యజమానిని విచారించి, దర్యాఫ్తుతో తృప్తి చెందామని, అందరినీ వదిలేశామని తెలిపారు.