హైద‌రాబాద్‌లో మ‌రో నకిలీ బాబా.. భ‌క్తుల‌కు తెలియ‌కుండా బంగారాన్ని కాజేసి ఇల్లు క‌ట్టుకున్న‌ వైనం!

హైద‌రాబాద్‌లో మ‌రో న‌కిలీ బాబా ఆట‌ల‌ను క‌ట్టించారు పోలీసులు. నిందితుడి నుంచి 1.07 కిలోల ఆభ‌ర‌ణాలు, రూ.3.05 ల‌క్ష‌ల న‌గ‌దు స్వాధీనం చేసుకున్నారు. పూర్తి వివ‌రాల్లోకి వెళితే న‌గ‌రంలోని టోలీచౌకిలోని ఓ ఇంట్లో ఆరేళ్లుగా ఇస్మాయిల్ బాబా పూజ‌లు నిర్వ‌హిస్తున్నాడు. దీర్ఘ‌కాలిక రోగాల‌ను ఒకే ఒక్క పూజ‌తో న‌యం చేస్తాన‌ని మాయ‌మాట‌లు చెప్పి, న‌మ్మిస్తూ అమాయ‌కుల‌ను దోచేస్తున్నాడు.

డబ్బు, బంగారానికి పూజ‌లు చేస్తే రోగాలు న‌య‌మ‌వుతాయ‌ని చెబుతున్నాడు. భ‌క్తులు ఆ బాబా చెప్పిన‌ట్లే డ‌బ్బు, బంగారంతో వ‌చ్చి వాటికి పూజ‌లు చేయించుకుంటున్నారు. అదే స‌మ‌యంలో ఇత‌రుల సాయంతో బాబా వాటిని కాజేస్తున్నాడు. ఎట్ట‌కేల‌కు ఆ బాబా మోసంపై పోలీసులు కేసు న‌మోదు చేసుకున్నారు. కాజేసిన బంగారాన్ని తాక‌ట్టుపెట్టి ఆ బాబా ఇల్లు నిర్మించుకున్న‌ట్లు పోలీసులు గుర్తించారు.