11 ఏళ్ల తర్వాత పాడినా చిక్కులే.. 'మాతృభూమి' పాటతో ఇరుక్కున్న సల్మాన్

బాలీవుడ్ సూపర్‌స్టార్ సల్మాన్ ఖాన్ తన తాజా చిత్రం 'మాతృభూమి: మే వార్ రెస్ట్ ఇన్ పీస్' కోసం పాడిన పాట తీవ్ర వివాదానికి దారితీసింది. దేశభక్తి నేపథ్యంలో తెరకెక్కుతున్న ఈ సినిమాలో 'తేరీ సెక్సీ బ్యూటీ' అంటూ సాగే పాట ఉండటంపై సోషల్ మీడియాలో తీవ్ర విమర్శలు వెల్లువెత్తుతున్నాయి. దాదాపు 11 ఏళ్ల తర్వాత సల్మాన్ గాయకుడిగా మారడం వార్తల్లో నిలిచినప్పటికీ, పాట సాహిత్యం మాత్రం నెటిజన్లకు ఆగ్రహం తెప్పించింది.

నవంబర్ 4న విడుదలైన ఈ పాటలో సల్మాన్ ఖాన్, చిత్రాంగద సింగ్ నటించారు. ముస్కాన్‌తో కలిసి సల్మాన్ ఈ గీతాన్ని ఆలపించారు. అయితే, 2020లో గల్వాన్ లోయలో భారత సైనికుల త్యాగాల ఆధారంగా తెరకెక్కిన సినిమాలో ఇలాంటి పాట పెట్టడంపై చాలామంది అభ్యంతరం వ్యక్తం చేస్తున్నారు. "తేరీ సెక్సీ బ్యూటీ కా ఫ్యాన్ బన్ గయా హూ, మై దో పెగ్ పీకే ఏరోప్లేన్ బన్ గయా హూ" (నీ సెక్సీ అందానికి అభిమానినయ్యాను, రెండు పెగ్గులు తాగి విమానంలా మారిపోయాను) వంటి సాహిత్యంపై తీవ్ర విమర్శలు వస్తున్నాయి. 

ఈ పాట విడుదలైన వెంటనే 'ఎక్స్' వేదికగా నెటిజన్లు సల్మాన్‌పై విరుచుకుపడ్డారు. "కల్నల్ సంతోష్ బాబు సహా 20 మంది సైనికులు ప్రాణాలు కోల్పోయిన గల్వాన్ ఘటన ఆధారంగా తీస్తున్న సినిమాలో ఇంత అశ్లీలమైన పాట ఎలా పెడతారు? అమరవీరులంటే కనీస గౌరవం లేదా?" అని ఒక యూజర్ ప్రశ్నించారు. "ఒక జాతీయ హీరో పాత్రను ఏం చేశారు? అసలు దేశభక్తి సినిమాలో ఇలాంటి పాట అవసరమా?" అని మరో నెటిజన్ మండిపడ్డారు.

విమర్శలు అక్కడితో ఆగలేదు. "మీరు 2016కు ముందులా సరిగ్గా పనిచేయలేకపోతే, దయచేసి రిటైర్ అవ్వండి. మీకున్న కాస్త పేరును కూడా నాశనం చేసుకోకండి" అని ఒక యూజర్ సల్మాన్‌కు ఘాటుగా సలహా ఇచ్చారు. మరికొందరు సల్మాన్ గాత్రాన్ని, పాట సాహిత్యాన్ని కూడా ట్రోల్ చేస్తున్నారు. అయితే, కొంతమంది అభిమానులు మాత్రం పాటకు మద్దతుగా నిలుస్తున్నారు. ట్యూన్ బాగుందని, చాలా రోజుల తర్వాత సల్మాన్ పాడటం సంతోషంగా ఉందని కామెంట్ చేస్తున్నారు.

గతంలో 'బ్యాటిల్ ఆఫ్ గల్వాన్' పేరుతో ఈ సినిమాను ప్రకటించారు. ఈ చిత్రంలో సల్మాన్ ఆర్మీ అధికారి పాత్రలో నటిస్తుండగా, ఆయన భార్యగా చిత్రాంగద సింగ్ కనిపించనున్నారు.