పలు దేశాల్లో గూగుల్ ఉద్యోగులకు ఎగ్జిట్ ఆఫర్.. కారణం ఇదే!

టెక్ దిగ్గజం గూగుల్.. ఆర్టిఫిషియల్ ఇంటెలిజెన్స్ (ఏఐ) పై భారీగా పెట్టుబడులు పెడుతూనే, మరోవైపు ఖర్చులను అదుపులో ఉంచుకునేందుకు కీలక చర్యలు చేపట్టింది. ఇందులో భాగంగా పలు దేశాల్లోని తమ ఉద్యోగులకు స్వచ్ఛందంగా వైదొలిగే (వాలంటరీ ఎగ్జిట్) అవకాశాన్ని కల్పిస్తోంది. సెవరెన్స్ ప్యాకేజీ తీసుకొని కంపెనీ నుంచి వైదొలగాలని కోరుకునే వారికి ఈ ఆఫర్‌ను అందిస్తోంది.

'రాయిటర్స్' కథనం ప్రకారం.. ఈ ఏడాది జూన్‌లో గూగుల్ ఈ ప్రోగ్రామ్‌ను కెనడా, ఫ్రాన్స్, జర్మనీ, జపాన్, స్విట్జర్లాండ్ దేశాలకు విస్తరించింది. వాస్తవానికి 2025 ప్రారంభంలో కొన్ని బృందాలకు ఇలాంటి ఆఫర్ ఇచ్చామని, జూన్ నుంచి మరిన్ని దేశాలకు విస్తరించామని గూగుల్ ప్రతినిధి ఒకరు రాయిటర్స్‌తో అన్నారు. ఎంతమంది ఉద్యోగులు ఈ ఆఫర్‌ను స్వీకరించారనే వివరాలను మాత్రం కంపెనీ వెల్లడించలేదు.

అయితే ఈ వాలంటరీ ఎగ్జిట్ ఆఫర్ గూగుల్‌లోని అన్ని విభాగాలకు వర్తించదు. కంపెనీ భవిష్యత్తుకు కీలకమైన ఏఐ రీసెర్చ్ విభాగం 'డీప్‌మైండ్', అలాగే 'గూగుల్ క్లౌడ్' టీమ్‌లకు ఈ ప్రోగ్రామ్ నుంచి మినహాయింపు ఇచ్చారు. ఈ రెండు విభాగాల్లో నియామకాలు అవసరమని గూగుల్ భావిస్తోంది. తద్వారా కొన్ని విభాగాల్లో సిబ్బందిని పునర్‌వ్యవస్థీకరిస్తూనే, ఏఐ, క్లౌడ్ వంటి కీలక రంగాల్లో పెట్టుబడులను కొనసాగించాలని కంపెనీ మాతృసంస్థ ఆల్ఫాబెట్ లక్ష్యంగా పెట్టుకుంది.

ఈ కార్యక్రమ ప్రభావం స్విట్జర్లాండ్‌లో స్పష్టంగా కనిపిస్తోంది. అక్కడ జూన్‌లో ఉద్యోగులకు ఈ ఆఫర్ అందగా, అంగీకరించిన వారు ఆగస్టు నుంచి వైదొలగడం ప్రారంభించారు. జ్యూరిచ్‌లో భారీ ఇంజినీరింగ్ కేంద్రం ఉన్న స్విట్జర్లాండ్‌లో దాదాపు 5,000 మంది గూగుల్ ఉద్యోగులు ఉన్నారు. ఇక్కడ అందించిన ఎగ్జిట్ ప్యాకేజీ ప్రకారం.. ఉద్యోగి పనిచేసిన ప్రతి సంవత్సరానికి ఒక నెల జీతం చొప్పున, గరిష్ఠంగా 12 నెలల జీతాన్ని చెల్లిస్తారు. దాదాపు 50 మంది సభ్యులు ఉన్న ఒక బృందం నుంచి కనీసం నలుగురు ఉద్యోగులు ఈ ఆఫర్‌ను స్వీకరించినట్లు సమాచారం.