క్రిప్టో స్కామ్ గుట్టురట్టు చేసిన ఏపీ సీఐడీ.. తెనాలి మహిళకు రూ.15 కోట్లు వెనక్కి!

ఆంధ్రప్రదేశ్ నేర పరిశోధన విభాగం (సీఐడీ) సంచలన విజయం సాధించింది. సుమారు రూ.15 కోట్ల విలువైన భారీ అంతర్జాతీయ క్రిప్టో కరెన్సీ మోసాన్ని ఛేదించి, నిందితుల నుంచి సొమ్మును బాధితురాలికి తిరిగి ఇప్పించడంలో సఫలమైంది. సంక్లిష్టమైన సాంకేతిక పరిజ్ఞానంతో కూడిన ఈ కేసు దర్యాప్తులో ఏపీ సీఐడీ చూపిన ప్రతిభపై సర్వత్రా ప్రశంసలు వెల్లువెత్తుతున్నాయి.

సీఐడీ విడుదల చేసిన పత్రికా ప్రకటన ప్రకారం, తెనాలికి చెందిన ఓ మహిళను అంతర్జాతీయ సైబర్ నేరగాళ్ల ముఠా లక్ష్యంగా చేసుకుంది. క్రిప్టో కరెన్సీలో పెట్టుబడులు పెడితే అధిక లాభాలు వస్తాయని నమ్మబలికి, ఆమె నుంచి విడతలవారీగా రూ.15 కోట్లు కాజేశారు. మోసపోయానని గ్రహించిన బాధితురాలు మంగళగిరిలోని సీఐడీ పోలీస్ స్టేషన్‌లో ఫిర్యాదు చేయగా, అధికారులు కేసు నమోదు చేసి దర్యాప్తు చేపట్టారు.

దర్యాప్తులో విస్తుపోయే నిజాలు వెలుగులోకి వచ్చాయి. బాధితురాలు తొలుత తన బ్యాంకు ఖాతాల నుంచి 13 వేర్వేరు క్రిప్టో వాలెట్లకు నిధులు బదిలీ చేశారు. ఆ తర్వాత నిందితుల సూచనలతో 'హనీకోంబ్‌ఏపీఐ.ఆర్గ్', 'అలీబార్బిట్.బిట్' వంటి నకిలీ ప్లాట్‌ఫామ్‌లలో పెట్టుబడి పెట్టారు. బిట్‌కాయిన్, సోలానా, డాగీకాయిన్ రూపంలో సుమారు 1.5 మిలియన్ డాలర్ల విలువైన 27 లావాదేవీలు జరిపారు.

ఈ నిధులను నిందితుల ముఠా అనేక మ్యూల్ ఖాతాల ద్వారా, పలు దశల్లో బదిలీ చేస్తూ (స్ట్రక్చర్డ్ లేయరింగ్) కేమన్ ఐలాండ్స్‌ కేంద్రంగా పనిచేసే 'గేట్ గ్లోబల్ కార్పొరేషన్' అనే క్రిప్టో ఎక్స్ఛేంజ్‌కు తరలించినట్లు సీఐడీ గుర్తించింది. బ్లాక్‌చెయిన్ లావాదేవీలను క్షుణ్నంగా విశ్లేషించి, కేంద్ర హోం మంత్రిత్వ శాఖకు చెందిన ఇండియన్ సైబర్ క్రైమ్ కోఆర్డినేషన్ సెంటర్ (I4C) సాంకేతిక సహకారంతో నిందితులకు చెందిన నాలుగు ఖాతాలను గుర్తించారు. వెంటనే న్యాయపరమైన చర్యలతో ఆ ఖాతాలను స్తంభింపజేశారు.

ఈ అంతర్జాతీయ ముఠాతో సంబంధం ఉన్న 8 మందిని సీఐడీ అరెస్ట్ చేసింది. వీరిలో ఇద్దరు హైదరాబాద్ వాసులు కాగా, ఇద్దరు మహారాష్ట్ర, ఒకరు మలేషియా, ఇద్దరు చైనా, ఒకరు పోర్చుగల్‌కు చెందిన వారు ఉన్నారు. ఈ ముఠాపై గుంటూరు కోర్టులో ఛార్జిషీట్ కూడా దాఖలు చేశారు.

కేసు విచారణ అనంతరం గుంటూరు కోర్టు కీలక ఆదేశాలు జారీ చేసింది. నిందితుల ఖాతాల్లో స్తంభింపజేసిన క్రిప్టో ఆస్తులను అప్పటి మార్కెట్ విలువకు అనుగుణంగా యూఎస్‌డీటీలోకి మార్చి, ఆ మొత్తాన్ని బాధితురాలి వాలెట్‌కు బదిలీ చేయాలని 'గేట్ గ్లోబల్ కార్పొరేషన్‌'ను ఆదేశించింది. అంతర్జాతీయ స్థాయిలో జరిగిన ఇలాంటి సంక్లిష్టమైన సైబర్ మోసంలో, పోయిన డబ్బును వెనక్కి రప్పించడం ఒక అసాధారణ విజయమని సీఐడీ అధికారులు పేర్కొన్నారు.