గాజులాంటి తల.. లోపల తిరిగే కళ్లు.. ఇలాంటి చేపను ఎప్పుడూ చూసి ఉండరు!

సముద్ర గర్భంలో ఎన్నో అంతుచిక్కని రహస్యాలు, వింత జీవులు దాగి ఉంటాయి. అలాంటి ఓ అద్భుతమైన, అత్యంత అరుదైన చేప తాజాగా శాస్త్రవేత్తల కెమెరాకు చిక్కింది. పారదర్శకమైన తల, దాని లోపల ఆకుపచ్చగా మెరుస్తూ కదిలే కళ్లు ఉన్న ఈ చేపను చూసి పరిశోధకులు అబ్బురపడ్డారు. 'బారెల్ ఐ ఫిష్' (Macropinna microstoma)గా పిలిచే ఈ జీవిని తొలిసారిగా అత్యంత స్పష్టతతో 4K రిజల్యూషన్‌లో చిత్రీకరించారు.

అమెరికాలోని మాంటెరీ బే అక్వేరియం రీసెర్చ్ ఇన్‌స్టిట్యూట్ (MBARI) శాస్త్రవేత్తలు తమ పరిశోధన నౌక 'ఆర్/వి డేవిడ్ ప్యాకార్డ్' నుంచి కాలిఫోర్నియా తీరానికి 90 కిలోమీటర్ల దూరంలో పరిశోధనలు చేస్తుండగా ఈ అద్భుతం చోటుచేసుకుంది. 'డాక్ రికెట్స్' అనే రిమోట్ ఆపరేటెడ్ వెహికల్ (ROV) సాయంతో సముద్రంలో సుమారు 600 మీటర్ల (1,970 అడుగులు) లోతులో ఈ చేపను గుర్తించారు. సుమారు 20 నిమిషాల పాటు దాని కదలికలను అత్యంత సమీపం నుంచి హై-రిజల్యూషన్ కెమెరాతో చిత్రీకరించారు.

బారెల్ ఐ చేప ప్రత్యేకతలు

ఈ చేప సముద్రంలోని 'ట్విలైట్ జోన్' (వెలుతురు తక్కువగా ఉండే ప్రాంతం)లో నివసిస్తుంది. దీని తల భాగం ఒక ద్రవంతో నిండిన గాజు డోమ్ లేదా హెల్మెట్ లాగా పూర్తిగా పారదర్శకంగా ఉంటుంది. దాని లోపల ఆకుపచ్చని గొట్టపు ఆకారంలో ఉండే కళ్లు ఉంటాయి. సాధారణంగా పైనుంచి వచ్చే కాంతిలో ఆహారం కోసం వెతుకుతూ ఈ కళ్లు పైకి చూస్తుంటాయి. ఆహారం దొరికినప్పుడు ముందుకు తిరుగుతాయి. ఈ పారదర్శక కవచం.. ఇతర జీవుల నుంచి తన సున్నితమైన కళ్లను కాపాడుకోవడానికి ఉపయోగపడుతుంది. తన పెద్ద రెక్కల సహాయంతో ఎక్కువ శక్తిని ఖర్చు చేయకుండా నీటిలో నిశ్చలంగా కదలకుండా ఉండగలదు.

శాస్త్రవేత్తలు గత 40 ఏళ్లలో 7,000 సార్లకు పైగా సముద్రంలోకి ROVలను పంపి పరిశోధనలు చేయగా, ఈ బారెల్ ఐ చేప కేవలం 11 సార్లు మాత్రమే కనిపించడం దాని అరుదైన ఉనికికి నిదర్శనం. చివరిసారిగా 2021లో కనిపించగా, ఇప్పుడు తొలిసారిగా 4K వీడియోలో దీనిని బంధించారు. ఈ హై-క్వాలిటీ ఫుటేజ్.. ఈ చేప జీవన విధానం, ప్రత్యేకమైన కళ్ల నిర్మాణం, ప్రవర్తనపై లోతైన అధ్యయనానికి ఎంతగానో సహాయపడుతుందని శాస్త్రవేత్తలు తెలిపారు. సముద్ర గర్భంలో ఇంకా మనకు తెలియని ఎన్నో అద్భుతాలు ఉన్నాయనడానికి ఈ జీవి ఒక నిలువుటద్దం అని వారు అభిప్రాయపడ్డారు.