బీజేపీకి షాక్.. దర్భంగా గ్రాడ్యుయేట్స్ స్థానాన్ని కైవసం చేసుకున్న ఆర్జేడీ

బిహార్ శాసనమండలి ఎన్నికల్లో నాటకీయ పరిణామాలు చోటుచేసుకున్నాయి. దర్భంగా గ్రాడ్యుయేట్స్ నియోజకవర్గ ఎమ్మెల్సీ స్థానాన్ని రాష్ట్రీయ జనతా దళ్ (ఆర్‌జేడీ) అభ్యర్థి అనిల్ కుమార్ ఝా కైవసం చేసుకున్నారు. సిట్టింగ్ ఎమ్మెల్సీ, బీజేపీ అభ్యర్థి సర్వేశ్ కుమార్‌పై ఆయన విజయం సాధించారు. దాదాపు 60 గంటల పాటు ఉత్కంఠభరితంగా సాగిన ఓట్ల లెక్కింపులో రెండో ప్రాధాన్యత ఓట్లు ఫలితాన్ని తారుమారు చేశాయి.

ఓట్ల లెక్కింపు ప్రక్రియ ఆరంభం నుంచి ఆర్జేడీ అభ్యర్థి అనిల్ కుమార్ ఝా వెనుకంజలోనే ఉన్నారు. 38వ రౌండ్ ముగిసేసరికి, బీజేపీ అభ్యర్థి సర్వేశ్ కుమార్ 20,033 ఓట్లతో, 19,029 ఓట్లు పొందిన ఝాపై 1,004 ఓట్ల ఆధిక్యంలో ఉన్నారు. అయితే, జన్ సురాజ్ పార్టీ అభ్యర్థి మహమ్మద్ ఇంతియాజ్ నూరానీ పోటీ నుంచి ఎలిమినేట్ కావడంతో సమీకరణాలు పూర్తిగా మారిపోయాయి.

నూరానీకి వచ్చిన ఓట్లలో రెండో ప్రాధాన్యత ఓట్లను బదిలీ చేయగా, అందులో సుమారు 2,900 ఓట్లు ఝాకు, 1,363 ఓట్లు కుమార్‌కు లభించాయి. దీంతో ఒక్కసారిగా ఝా ఆధిక్యంలోకి దూసుకెళ్లారు. తుది ఫలితాల్లో అనిల్ కుమార్ ఝాకు 25,406 ఓట్లు, సర్వేశ్ కుమార్‌కు 21,396 ఓట్లు పోలయ్యాయి. దీంతో 4,010 ఓట్ల మెజారిటీతో ఝా గెలిచినట్లు రిటర్నింగ్ అధికారి, దర్భంగా డివిజనల్ కమిషనర్ హిమాన్షు కుమార్ రాయ్ ప్రకటించారు. అనంతరం ఝాకు ఎన్నికల ధ్రువీకరణ పత్రాన్ని అందజేశారు. కౌంటింగ్ కేంద్రంలోనే సర్వేశ్ కుమార్.. విజేత అనిల్ కుమార్ ఝాను అభినందించారు.

ఈ నెల 23న జరిగిన ఈ ఎన్నికల బరిలో మొత్తం 40 మంది అభ్యర్థులు నిలిచారు. ఈ విజయంతో దర్భంగా పరిధిలోని రెండు ఎమ్మెల్సీ స్థానాలను బీజేపీ కోల్పోయినట్లయింది. మొత్తం 8 పట్టభద్రులు, ఉపాధ్యాయ నియోజకవర్గాల్లో జరిగిన ఎన్నికల్లో బీజేపీ, ఆర్జేడీ చెరో రెండు స్థానాలు గెలుచుకోగా.. జేడీయూ, జన్ సురాజ్ పార్టీ ఒక్కో స్థానంలో, ఇద్దరు స్వతంత్రులు రెండు స్థానాల్లో విజయం సాధించారు.