ఇక కబ్జా కుదరదు.. ఆర్.కె.పురం చెరువుకు 'హైడ్రా' కంచె

హైదరాబాద్‌లోని ఆర్‌.కె.పురం చెరువు ఆక్రమణల పర్వానికి హైడ్రా (HYDRAA) గురువారం శాశ్వత అడ్డుకట్ట వేసింది. భవిష్యత్తులో మళ్లీ కబ్జాలకు ఆస్కారం లేకుండా చెరువు పూర్తిస్థాయి నీటిమట్టం (ఎఫ్‌టీఎల్) పరిధిలో పటిష్ఠమైన ఫెన్సింగ్ ఏర్పాటు చేసింది. ఏళ్ల తరబడి కొనసాగుతున్న ఆక్రమణల సమస్యకు ఈ చర్యతో పరిష్కారం లభించినట్లయింది.

ఈ కార్యక్రమానికి ముందు, చెరువు ఎఫ్‌టీఎల్ పరిధిలోని సుమారు 12 ఎకరాల విస్తీర్ణంలో ఉన్న అక్రమ నిర్మాణాలను హైడ్రా అధికారులు తొలగించారు. కొందరు వ్యక్తులు ప్రీకాస్ట్ గోడలు, కంచెలు వేసుకుని తమ ఆధీనంలోకి తీసుకున్న భూములను స్వాధీనం చేసుకున్నారు. అక్రమంగా ఏర్పాటు చేసిన పందుల వధశాలలను (కబేళాలను) కూడా కూల్చివేసి, ఆ ప్రాంతాన్ని శుభ్రం చేశారు.

స్థానికంగా మినీ ట్యాంక్‌బండ్‌గా పేరుగాంచిన ఆర్‌.కె.పురం చెరువు (ముక్కిడికుంట) కొంతకాలంగా కాలుష్యం, కబ్జాలతో కునారిల్లుతోంది. చెరువు పరిధిలో అక్రమ నిర్మాణాలు చేపట్టడం, పందులను వధించి వ్యర్థాలను చెరువులోనే పారబోయడం వంటి సమస్యలపై స్థానికులు 'ప్రజావాణి'లో పలుమార్లు ఫిర్యాదు చేశారు. ఈ ఫిర్యాదులపై క్షేత్రస్థాయిలో విచారణ జరిపిన అధికారులు, ఆక్రమణలను నిర్ధారించుకున్న తర్వాత ఈ చర్యలు చేపట్టారు.

మేడ్చల్-మల్కాజిగిరి జిల్లా, మౌలాలి సర్కిల్ పరిధిలో ఉన్న ఈ చెరువు మొత్తం విస్తీర్ణం 75 ఎకరాలు. ఇప్పటికే ఇందులో 11 ఎకరాల మేర శాశ్వత నిర్మాణాలు వెలిశాయి. తాజాగా మరో 12 ఎకరాలను కూడా ఆక్రమించే ప్రయత్నాలు జరగడంతో హైడ్రా రంగంలోకి దిగింది. ఆక్రమణల తొలగింపుతో పాటు, ఇది చెరువు ఎఫ్‌టీఎల్ భూమి అని స్పష్టంగా తెలియజేస్తూ అధికారులు ప్రత్యేకంగా బోర్డులను కూడా ఏర్పాటు చేశారు. ఈ చర్యతో మినీ ట్యాంక్‌బండ్‌కు పూర్వ వైభవం తీసుకురావడంతో పాటు, పర్యావరణాన్ని కాపాడేందుకు మార్గం సుగమమైందని స్థానికులు భావిస్తున్నారు.