సూడాన్‌లో మార్కెట్‌పై జరిగిన డ్రోన్ దాడిలో 100 మందికి పైగా మృతి

అంతర్యుద్ధంతో అట్టుడుకుతున్న సూడాన్‌లో పరిస్థితి మరింత దారుణంగా మారుతోంది. రాజధాని ఖార్తూమ్ శివార్లలోని కీలకమైన విద్యుత్ కేంద్రంపై డ్రోన్ దాడి జరగడంతో నగరంలోని చాలా ప్రాంతాలు అంధకారంలోకి వెళ్లిపోయాయి. మరోవైపు, రద్దీగా ఉండే మార్కెట్‌పై జరిగిన దాడిలో వందలాది మంది ప్రాణాలు కోల్పోయారు. ఈ రెండు ఘటనలతో దేశంలో మానవతా సంక్షోభం తీవ్రరూపం దాల్చింది.

వివరాల్లోకి వెళితే.. ఖార్తూమ్ సమీపంలోని ఒమ్‌దుర్మాన్‌లో ఉన్న అల్-మర్ఖియత్ ట్రాన్స్‌ఫార్మర్ స్టేషన్‌పై మంగళవారం డ్రోన్‌తో దాడి జరిగింది. దీంతో రాజధానిలోని పలు ప్రాంతాల్లో 12 గంటలకు పైగా విద్యుత్ సరఫరా నిలిచిపోయింది. కరెంట్ లేకపోవడంతో నీటి సరఫరా వ్యవస్థ కూడా స్తంభించి, ప్రజలు తీవ్ర ఇబ్బందులు ఎదుర్కొన్నారు. ఆసుపత్రులు, బేకరీలు జనరేటర్లపై ఆధారపడాల్సి వచ్చింది.

ఈ దాడి వల్ల రాజధానిలోని 60 శాతం విద్యుత్ సరఫరాపై ప్రభావం పడిందని, దీని వెనుక రాపిడ్ సపోర్ట్ ఫోర్సెస్ (ఆర్‌ఎస్‌ఎఫ్) హస్తం ఉందని విద్యుత్ శాఖ అధికారి ఒకరు ఆరోపించారు. ఈ ఏడాది ఇదే స్టేషన్‌పై ఇది రెండో దాడి అని ఆయన తెలిపారు.

మరోవైపు, సోమవారం సాయంత్రం దక్షిణ డార్ఫర్ రాజధాని న్యాలాలోని ఓ మార్కెట్‌పై సూడాన్ సైన్యం డ్రోన్‌తో దాడి చేసినట్లు ఓ సంస్థ నివేదించింది. ఈ దాడిలో 100 మందికి పైగా మరణించారని, వారిలో ఎక్కువ మంది మహిళలు, చిన్నారులే ఉన్నారని 'ఎమర్జెన్సీ లాయర్స్' అనే బృందం పేర్కొంది. ఘటనపై స్వతంత్ర దర్యాప్తు జరపాలని డిమాండ్ చేసింది. 

ఈ నగరం ప్రస్తుతం ఆర్‌ఎస్‌ఎఫ్ నియంత్రణలో ఉంది. తమ ఆసుపత్రికి 36 మృతదేహాలు వచ్చాయని, సుమారు 150 మందికి చికిత్స అందిస్తున్నామని 'డాక్టర్స్ వితౌట్ బోర్డర్స్' సంస్థ వెల్లడించింది. సూడాన్‌లో 2023 ఏప్రిల్ నుంచి సైన్యానికి, పారామిలటరీ గ్రూప్ ఆర్‌ఎస్‌ఎఫ్‌కు మధ్య భీకర పోరు కొనసాగుతోంది. 

ఇరు పక్షాలు డ్రోన్లను విరివిగా ఉపయోగిస్తూ దాడులకు పాల్పడుతున్నాయి. ఈ ఘర్షణల కారణంగా సూడాన్‌లో ప్రపంచంలోనే అతిపెద్ద మానవతా సంక్షోభం నెలకొందని ఐక్యరాజ్యసమితి ఆందోళన వ్యక్తం చేసింది. ఇప్పటివరకు ఈ యుద్ధంలో పదివేల మందికి పైగా మరణించగా, లక్షలాది మంది నిరాశ్రయులయ్యారు.