న్యూయార్క్ ఏజీ బరిలో భారత సంతతి మహిళ.. లెటిటియా జేమ్స్‌కు గట్టి పోటీ!

అమెరికా ఎన్నికల్లో భారత సంతతికి చెందిన మరో మహిళ కీలక పదవికి పోటీ పడుతున్నారు. న్యూయార్క్ అటార్నీ జనరల్ (ఏజీ) పదవికి రిపబ్లికన్ పార్టీ అభ్యర్థిగా సరిత కోమటిరెడ్డి బరిలోకి దిగారు. నవంబర్ 3న జరగనున్న ఈ ఎన్నికల్లో ఆమె ప్రస్తుత డెమోక్రటిక్ ఏజీ లెటిటియా జేమ్స్‌కు గట్టి సవాలు విసురుతున్నారు.

భారతీయ వలసదారుల కుమార్తె అయిన సరిత, తనను తాను 'క్రైమ్ ఫైటర్'గా అభివర్ణించుకుంటూ ముమ్మరంగా ప్రచారం నిర్వహిస్తున్నారు. గతంలో ఫెడరల్ ప్రాసిక్యూటర్‌గా పనిచేసిన అనుభవంతో, న్యూయార్క్‌లో నేరాలను అరికట్టడమే తన ప్రధాన లక్ష్యమని ఆమె స్పష్టం చేశారు. ఏజీ కార్యాలయంలో ప్రస్తుతం క్రిమినల్ కేసులను పర్యవేక్షిస్తున్న న్యాయవాదుల సంఖ్యను మూడు రెట్లు పెంచుతానని ఆమె హామీ ఇస్తున్నారు.

అక్టోబర్ 9న జేమ్స్‌తో జరిగిన చర్చ (డిబేట్) తర్వాత సరిత ప్రచారానికి మరింత ఊపు వచ్చింది. అప్పటి నుంచి ఇప్పటివరకు ఆమె 1 మిలియన్ డాలర్లకు పైగా విరాళాలు సేకరించారు. టీవీ ప్రకటనల వ్యయం విషయంలోనూ ఆమె తన ప్రత్యర్థిని మించి దూసుకుపోతున్నారు. సియానా పోల్‌లో జేమ్స్ 52-39 శాతం ఆధిక్యంలో ఉన్నప్పటికీ, సరిత బృందం నిర్వహించిన అంతర్గత సర్వేలో మాత్రం ఇద్దరి మధ్య వ్యత్యాసం అత్యంత స్వల్పంగా (50.7 శాతం - 44.7 శాతం) ఉన్నట్లు వెల్లడైంది.

రిపబ్లికన్ పార్టీలో వైవిధ్యానికి కొదవలేదని, ఉపాధ్యక్ష అభ్యర్థి జేడీ వాన్స్ భార్య ఉషా వాన్స్ ఇందుకు నిదర్శనమని సరిత పేర్కొన్నారు. హార్వర్డ్ లా స్కూల్ గ్రాడ్యుయేట్ అయిన సరిత, గతంలో ట్రంప్ హయాంలో ఫెడరల్ జడ్జి పదవికి నామినేట్ అయ్యారు. 2020 ఎన్నికల్లో జో బైడెన్ విజయాన్ని ఆమె బహిరంగంగానే అంగీకరించారు. ప్రముఖ బేస్‌బాల్ క్రీడాకారుడు మార్క్ టెక్సీరా, న్యూయార్క్ మాజీ పోలీస్ కమిషనర్ రేమండ్ కెల్లీ వంటి ప్రముఖులు సరితకు తమ మద్దతు ప్రకటించారు.