పంజాబ్‌లో కారు బీభత్సం.. టోల్ ఉద్యోగిని బానెట్‌పై ఈడ్చుకెళ్లిన డ్రైవర్

పంజాబ్‌లో దారుణ ఘటన చోటుచేసుకుంది. పటియాలా జిల్లాలో ఓ కారు బీభత్సం సృష్టించింది. టోల్ ప్లాజా వద్ద రుసుము చెల్లించకుండా వేగంగా దూసుకొచ్చి, అడ్డుగా ఉన్న బ్యారియర్లను ఢీకొట్టింది. ఆ సమయంలో అక్కడ విధుల్లో ఉన్న ఓ ఉద్యోగిని ఢీకొట్టి, అతడిని కారు బానెట్‌పై కొన్ని మీటర్ల దూరం ఈడ్చుకెళ్లింది. ఈ షాకింగ్ ఘటన శనివారం తెల్లవారుజామున జరిగింది.

పటియాలా-రాజ్‌పురా హైవేపై ఉన్న ధరేరి జట్టన్ టోల్ ప్లాజా వద్ద తెల్లవారుజామున 3:58 గంటలకు ఈ ఘటన చోటుచేసుకుంది. వేగంగా వచ్చిన ఓ తెలుపు రంగు కారు, టోల్ ప్లాజా వద్ద ఆగకుండా బూమ్ బ్యారియర్‌ను బలంగా ఢీకొట్టింది. అదే సమయంలో అక్కడే ఉన్న ఉద్యోగి అమన్‌దీప్ సింగ్‌ను ఢీకొట్టడంతో, అతను కారు బానెట్‌పై పడిపోయాడు. అయినప్పటికీ డ్రైవర్ కారును ఆపకుండా ముందుకు పోనివ్వడంతో, బాధితుడు కొంత దూరం వరకు బానెట్‌పైనే ఉండిపోయాడు. ఆ తర్వాత కిందపడిపోగా, కారు డ్రైవర్ ఆగకుండా అక్కడి నుంచి పరారయ్యాడు. ఈ దృశ్యాలన్నీ అక్కడి సీసీటీవీ కెమెరాల్లో స్పష్టంగా రికార్డయ్యాయి.

ఈ ప్రమాదంలో తీవ్రంగా గాయపడిన అమన్‌దీప్ సింగ్‌ను వెంటనే పటియాలాలోని ప్రభుత్వ ఆసుపత్రికి తరలించారు. అతనికి తీవ్ర గాయాలైనప్పటికీ, ప్రస్తుతం ప్రాణాపాయం నుంచి బయటపడ్డాడని, చికిత్స కొనసాగుతోందని వైద్యులు తెలిపారు. అతను పటియాలా జిల్లా, ఘుమానా గ్రామానికి చెందిన వ్యక్తిగా గుర్తించారు.

ఈ ఘటనపై కేసు నమోదు చేసుకున్న పోలీసులు, సీసీటీవీ ఫుటేజీ ఆధారంగా కారు రిజిస్ట్రేషన్ నంబర్‌ను గుర్తించారు. కారులో డ్రైవర్ ఒక్కడే ఉన్నట్లు నిర్ధారించి, అతని కోసం గాలింపు చర్యలు ముమ్మరం చేశారు. ఈ ఘటనపై టోల్ ప్లాజా కార్మికులు తీవ్ర ఆగ్రహం వ్యక్తం చేశారు. నిందితుడిని వెంటనే అరెస్ట్ చేయాలని, లేనిపక్షంలో పెద్ద ఎత్తున ఆందోళనలు, రహదారుల దిగ్బంధం చేపడతామని హెచ్చరించారు.