పసిఫిక్‌ మహాసముద్రంలో తొలిసారి 30 డిగ్రీలకు చేరిన ఉష్ణోగ్రతలు.. మరింత బలపడుతున్న ఎల్‌నినో!

పసిఫిక్‌ మహాసముద్రంలో సముద్ర ఉపరితల ఉష్ణోగ్రతలు చారిత్రక గరిష్ఠానికి చేరాయి. ఎల్‌నినో ప్రభావం పెరుగుతున్న నేపథ్యంలో భూమధ్య రేఖకు సమీపంలోని మధ్య పసిఫిక్‌ ప్రాంతంలో ఉష్ణోగ్రతలు తొలిసారి 30 డిగ్రీల సెల్సియస్‌ మార్కును దాటాయి. అమెరికా జాతీయ సముద్ర, వాతావరణ పరిపాలనా సంస్థ (ఎన్‌ఓఏఏ) సమాచారాన్ని ఆధారంగా చేసుకుని ఈ వివరాలను వెల్లడించారు. అక్టోబర్‌ 22న ఈ ప్రాంతంలో ఉష్ణోగ్రత 30 డిగ్రీలకు చేరినట్లు ‘ఇండియా టుడే’ తెలిపింది. అందుబాటులో ఉన్న రికార్డుల ప్రకారం, ఈ స్థాయికి చేరడం ఇదే తొలిసారి. 

ఎల్‌నినో అనేది పసిఫిక్‌ మహాసముద్రంలోని మధ్య, తూర్పు ఉష్ణమండల ప్రాంతాల్లో సముద్ర ఉపరితల జలాలు సాధారణం కంటే ఎక్కువగా వేడెక్కే సహజ వాతావరణ పరిణామం. దీనివల్ల సముద్రంపై వీచే గాలులు, మేఘాల కదలికలు, వర్షపాత నమూనాల్లో మార్పులు వస్తాయి. ఈ ప్రభావం పసిఫిక్‌ ప్రాంతానికే పరిమితం కాకుండా ప్రపంచంలోని పలు దేశాల వాతావరణంపైనా పడుతుంది. కొన్ని ప్రాంతాల్లో కరవు, అధిక ఉష్ణోగ్రతలు పెరిగే అవకాశం ఉండగా.. మరికొన్ని చోట్ల భారీ వర్షాలు, వరదల ముప్పు పెరుగుతుంది. 

ప్రపంచ వాతావరణ సంస్థ (డబ్ల్యూఎంఓ) అంచనాల ప్రకారం.. 2026 అక్టోబర్‌-డిసెంబర్‌ మధ్య ఎల్‌నినో మరింత బలపడే అవకాశం ఉంది. డిసెంబర్‌ నాటికి ఇది గరిష్ఠ స్థాయికి చేరవచ్చని అంచనా వేస్తున్నారు. ఎల్‌నినో తీవ్రతను అంచనా వేయడానికి శాస్త్రవేత్తలు ఉపయోగించే నినో 3.4 సూచీలో సముద్ర ఉష్ణోగ్రతలు సాధారణ స్థాయి కంటే జూన్‌లో 1.6 డిగ్రీలు, ఆగస్టులో 2.5 డిగ్రీలు అధికంగా నమోదయ్యాయి. అక్టోబర్‌-డిసెంబర్‌ కాలానికి ఈ వ్యత్యాసం 3.7 డిగ్రీలకు చేరవచ్చని డబ్ల్యూఎంఓ అంచనా వేసింది. ఇది గతంలో నమోదైన గరిష్ఠ స్థాయి కంటే ఎక్కువ. అయితే ఈ సంఖ్యలు సముద్రం వాస్తవ ఉష్ణోగ్రతను కాకుండా, దీర్ఘకాలిక సగటుతో పోలిస్తే ఎంత ఎక్కువగా ఉందో సూచిస్తాయి. 

భారత్‌పైనా ఈ పరిణామాల ప్రభావం ఉండొచ్చని వాతావరణ నిపుణులు అంచనా వేస్తున్నారు. 2026లో నైరుతి రుతుపవనాల సీజన్‌ సాధారణం కంటే 13 శాతం తక్కువ వర్షపాతంతో ముగిసింది. అక్టోబర్‌-డిసెంబర్‌ మధ్య దేశంలోని చాలా ప్రాంతాల్లో సాధారణం కంటే తక్కువ వర్షాలు కురిసే అవకాశం ఉందని భారత వాతావరణ శాఖ అంచనా వేసింది. అయితే దక్షిణ ద్వీపకల్ప ప్రాంతంలో మొత్తం మీద సాధారణ వర్షపాతం నమోదయ్యే అవకాశముందని తెలిపింది. ప్రాంతాలవారీగా పరిస్థితులు మారవచ్చని, ఎల్‌నినో ఒక్కటే భారత వాతావరణాన్ని నిర్ణయించదని నిపుణులు స్పష్టం చేస్తున్నారు. 

మరోవైపు, సముద్రాలు ఇప్పటికే అసాధారణంగా వేడెక్కుతున్న నేపథ్యంలో బలమైన ఎల్‌నినో ప్రపంచవ్యాప్తంగా ఉష్ణోగ్రతలను మరింత పెంచే ప్రమాదం ఉందని డబ్ల్యూఎంఓ హెచ్చరించింది. ఈ ప్రభావం 2027 ఆరంభం వరకు కొనసాగవచ్చని అంచనా వేస్తోంది. అయితే దీని తీవ్రత, వర్షపాతంపై ప్రభావం ప్రాంతాన్ని బట్టి మారుతుంది. అందువల్ల రాబోయే నెలల్లో సముద్ర ఉష్ణోగ్రతలు, గాలుల దిశ, వర్షపాత అంచనాలను శాస్త్రవేత్తలు నిరంతరం పరిశీలించనున్నారు.