చైనా గస్తీ తీరుతో సరిహద్దుల్లో అలజడి.. కేంద్రం కీలక ప్రకటన

చైనా సైన్యం నిర్దేశిత గస్తీ విధానాలకు భిన్నంగా వ్యవహరించినప్పుడల్లా భారత్‌-చైనా సరిహద్దుల్లో పరిస్థితులు అప్పుడప్పుడు ఉద్రిక్తంగా మారుతున్నాయని కేంద్ర విదేశాంగ శాఖ వెల్లడించింది. అరుణాచల్‌ప్రదేశ్‌లోని పలు ప్రాంతాల్లో చైనా సైనికులతో ముఖాముఖి పరిస్థితులు కొనసాగుతున్నాయని ఇండో-టిబెటన్‌ బోర్డర్‌ పోలీస్‌ (ఐటీబీపీ) డైరెక్టర్‌ జనరల్‌ శత్రుజీత్‌ కపూర్‌ ప్రకటించిన మరుసటి రోజే కేంద్రం ఈ వ్యాఖ్యలు చేసింది.

రక్షణ శాఖను సంప్రదించండి
ఐటీబీపీ చీఫ్‌ వ్యాఖ్యలపై శుక్రవారం మీడియా ప్రతినిధులు ప్రశ్నించగా.. విదేశాంగ శాఖ అధికార ప్రతినిధి రణధీర్‌ జైస్వాల్‌ నేరుగా స్పందించలేదు. ఈ అంశంపై రక్షణ శాఖను సంప్రదించాలని సూచించారు. అయితే, చైనా బలగాలు నిర్దేశిత గస్తీ విధానాలను ఉల్లంఘించినప్పుడు సరిహద్దుల్లో పరిస్థితులు మారుతున్నాయని గతంలోనూ చెప్పినట్లు గుర్తుచేశారు.

చర్చలతో సమస్యల పరిష్కారం
వాస్తవాధీన రేఖ (ఎల్‌ఏసీ) వెంబడి అపోహలు, తప్పుడు అంచనాలు తలెత్తకుండా భారత్‌, చైనా దౌత్య, సైనిక మార్గాల్లో చర్చలు కొనసాగిస్తున్నాయని జైస్వాల్‌ తెలిపారు. సరిహద్దు నిర్వహణను మెరుగుపరిచేందుకు కొన్ని ప్రాంతాల్లో ఎల్‌ఏసీపై పరస్పర అవగాహన పెంచుకునే అంశంపైనా చర్చించేందుకు రెండు దేశాలు అంగీకరించాయని చెప్పారు. సరిహద్దుల్లో శాంతి, ప్రశాంతత కొనసాగడం ద్వైపాక్షిక సంబంధాల అభివృద్ధికి కీలకమని స్పష్టం చేశారు.

అరుణాచల్‌లో ముఖాముఖి పరిస్థితులు
రాజస్థాన్‌లోని ఐటీబీపీ స్థావరంలో గురువారం సిబ్బందిని ఉద్దేశించి మాట్లాడిన కపూర్‌.. అరుణాచల్‌ప్రదేశ్‌లోని పలు ప్రాంతాల్లో చైనా సైనికులతో ముఖాముఖి పరిస్థితులు ఏర్పడ్డాయని, అవి ఇంకా కొనసాగుతున్నాయని చెప్పారు. ఈ సందర్భంగా ఐటీబీపీ కొత్తగా ఏర్పాటు చేసిన ‘శౌర్య’ కమాండోలు తమ సామర్థ్యాలను ప్రదర్శించారని వెల్లడించారు. చైనా సరిహద్దును తమ దళానికి అత్యంత క్లిష్టమైన ప్రాంతంగా అభివర్ణించారు.

డ్రోన్లపై ప్రత్యేక దృష్టి
చైనా సైన్యం ఆధునికీకరణను కపూర్‌ ప్రస్తావించారు. సంప్రదాయ పద్ధతుల్లో చైనాతో పోటీపడటం కష్టమని, డ్రోన్లు, వాటిని ఎదుర్కొనే వ్యవస్థలపై భారత్‌ భారీగా దృష్టి పెట్టాలని సూచించారు. డ్రోన్ల రాకతో సంప్రదాయ సైన్యాల పాత్ర మారిందని పేర్కొన్నారు. అయితే, సరిహద్దుల్లో సాధారణ మోహరింపు, సన్నద్ధతకు సంబంధించిన సందర్భంలోనే ఆయన ఈ వ్యాఖ్యలు చేసినట్లు అధికార వర్గాలు తెలిపాయి. నిర్దిష్ట ఘటనను ఆయన ప్రస్తావించలేదని పేర్కొన్నాయి.

చైనాతో భారత్‌కు 3,488 కిలోమీటర్ల వాస్తవాధీన రేఖ ఉంది. 2020 జూన్‌లో గల్వాన్‌ లోయలో జరిగిన ఘర్షణలో 20 మంది భారత సైనికులు మరణించిన తర్వాత సరిహద్దు పరిస్థితులపై ఇరు దేశాల మధ్య ఉద్రిక్తతలు పెరిగాయి. అయితే, ప్రస్తుతం పరిస్థితి స్థిరంగా ఉందని చీఫ్‌ ఆఫ్‌ డిఫెన్స్‌ స్టాఫ్‌ జనరల్‌ ఎన్‌ఎస్‌ రాజా సుబ్రమణి సెప్టెంబరులో పేర్కొన్నారు. విదేశాంగ మంత్రి ఎస్‌. జైశంకర్‌ సైతం చైనాతో సంబంధాలు సాధారణ స్థితికి రావాలంటే సరిహద్దుల్లో శాంతి అవసరమని ఇటీవల స్పష్టం చేశారు.