సౌదీపై హౌతీల సరికొత్త అస్త్రం.. ఎప్‌స్టీన్ కేసుతో దాడి!

యెమెన్‌ను నియంత్రణలో ఉంచుకున్న హౌతీ తిరుగుబాటుదారులు, తమ ప్రధాన శత్రువైన సౌదీ అరేబియాపై క్షిపణులు లేదా డ్రోన్లతో కాకుండా ఒక వినూత్న ప్రచార అస్త్రంతో దాడి చేస్తున్నారు. అమెరికాకు చెందిన సెక్స్ నేరగాడు, ఫైనాన్షియర్ అయిన దివంగత జెఫ్రీ ఎప్‌స్టీన్ పేరును వాడుకుంటూ సౌదీ ప్రతిష్ఠ‌ను దెబ్బతీసేందుకు ప్రయత్నిస్తున్నారు. ఈ మేరకు 'న్యూయార్క్ టైమ్స్' ఒక కథనాన్ని ప్రచురించింది.

గత కొన్ని వారాలుగా, అమెరికా న్యాయ శాఖ విడుదల చేసిన ఎప్‌స్టీన్ కేసు సంబంధిత పత్రాలపై హౌతీలు దృష్టి సారించారు. ముఖ్యంగా సౌదీ రాజకుటుంబ సహచరులు కొందరు ఎప్‌స్టీన్‌కు ఇస్లాం పవిత్ర స్థలమైన కాబా చిత్రాలతో కూడిన అలంకరణ వస్త్రాలను బహుమతిగా పంపారని వెల్లడైన నివేదికలను వారు ప్రధానంగా ప్రచారం చేస్తున్నారు. తమను తాము ఇస్లాం రక్షకులుగా చిత్రీకరించుకుంటూ, సౌదీ అరేబియా ఇస్లాం విరోధి అనే భావనను కలిగించేందుకు ఈ అంశాన్ని వాడుకుంటున్నారు.

సౌదీ మద్దతు ఉన్న యెమెన్ ప్రభుత్వంపై హౌతీలు అంతర్యుద్ధం చేస్తున్న విషయం తెలిసిందే. ఈ నేపథ్యంలో తమ శత్రువులైన సౌదీ అరేబియా, ఇతర దేశాలను లక్ష్యంగా చేసుకుని హౌతీలు వీడియోలు, పాటలు, ప్రసంగాలు, సోషల్ మీడియా ఇన్‌ఫ్లుయెన్సర్ పోస్టుల ద్వారా భారీ ప్రచార కార్యక్రమాన్ని నడుపుతున్నారు.

ఇటీవల, హౌతీలు డ్రోన్లు, క్షిపణులతో మక్కాను లక్ష్యంగా చేసుకున్నారని సౌదీ అరేబియా ఆరోపించింది. అయితే, ఈ ఆరోపణలను హౌతీలు తీవ్రంగా ఖండించారు. దీనికి కౌంటర్‌గా హౌతీ అధ్యక్షుడు మహదీ అల్-మషత్.. "ఎవరైతే ఎప్‌స్టీన్‌కు కాబా వస్త్రాలను బహుమతిగా ఇచ్చారో, వారే నిజానికి మక్కాను లక్ష్యంగా చేసుకుంటున్నారు" అని సంచలన వ్యాఖ్యలు చేశారు. ఈ సందేశాన్ని హౌతీ మద్దతుదారులు వివిధ రూపాల్లో ప్రచారం చేస్తున్నారు.

యెమెన్‌కు చెందిన కమెడియన్ ముస్తఫా అల్-మొమారి, 'ఎక్స్‌'లో (ట్విట్టర్) 27 లక్షలకు పైగా ఫాలోవర్లను కలిగి ఉన్నారు. ఆయన ఈ విషయంపై ఒక వీడియో చేసి సౌదీని విమర్శించారు. మరో సంప్రదాయ సంగీత విద్వాంసుడు ఈ ఆరోపణలపై ఒక పాటను కూడా రూపొందించారు. సౌదీ అధికారులు మాత్రం ఈ ఆరోపణలపై గానీ, కాబా వస్త్రాల నివేదికలపై గానీ ఇప్పటివరకు ఎలాంటి అధికారిక ప్రకటన చేయలేదు.

హౌతీల నాయకుడు అబ్దుల్-మాలిక్ అల్-హౌతీ తన ప్రసంగాల్లో తరచూ ఎప్‌స్టీన్ ప్రస్తావన తెస్తున్నారు. "ఎప్‌స్టీన్ ఫైల్స్ తీవ్రమైన దృష్టిని కోరుతున్నాయి. అవి నాయకులు, ఉన్నత వర్గాలకు శిక్షణ ఇచ్చే ఒక జియోనిస్ట్ ఇంక్యుబేటర్‌ను బయటపెట్టాయి" అని ఆయన ఒక ప్రసంగంలో పేర్కొన్నారు.

హౌతీల ఈ వ్యూహం కొంతవరకు పనిచేస్తున్నట్లు కనిపిస్తోంది. అమెరికాకు చెందిన ప్రముఖ పాడ్‌కాస్టర్ జేక్ షీల్డ్స్, హౌతీల ధైర్యాన్ని మెచ్చుకుంటూ.. "నేను వారికి పెద్ద అభిమానిని. వాళ్లు చాలా పవర్‌ఫుల్" అని వ్యాఖ్యానించడం గమనార్హం. మొత్తంగా ఒక అంతర్జాతీయ సెక్స్ కుంభకోణాన్ని తమ ప్రాంతీయ ఆధిపత్య పోరులో ఒక శక్తిమంతమైన ప్రచార ఆయుధంగా హౌతీలు విజయవంతంగా మలుచుకుంటున్నారు.