మహారాష్ట్రలో దారుణ హత్య.. నడిరోడ్డుపై కారుతో ఢీకొట్టి, రాడ్డుతో కొట్టి హత్య

మహారాష్ట్రలోని ఛత్రపతి శంభాజీనగర్‌లో పట్టపగలే నడిరోడ్డుపై ఒక దారుణ హత్య కలకలం రేపింది. గురువారం నగరంలోని అత్యంత రద్దీగా ఉండే సిడ్కో ఎన్-7 ప్రాంతంలోని బజరంగ్ చౌక్ సమీపంలో ఈ దుర్ఘటన చోటుచేసుకుంది. స్కూటీపై వెళ్తున్న ఓ వ్యక్తిని కారుతో వెనుక నుంచి ఢీకొట్టి, కిందపడిన తర్వాత హాకీ స్టిక్, ఇనుప రాడ్‌తో తల, ముఖంపై కిరాతకంగా దాడి చేసి హత్య చేశారు.

మృతుడిని దేవేష్ అలియాస్ బంటీ దీక్షిత్‌గా గుర్తించారు. ఆయన జిమ్ నుంచి ఇంటికి తిరిగి వస్తుండగా ఈ దాడి జరిగింది. పవన్ పరాశర్ అనే వ్యక్తి తన కారుతో దీక్షిత్ స్కూటీని బలంగా ఢీకొట్టడంతో ఆయన రోడ్డుపై పడిపోయాడు. వెంటనే కారు దిగిన పవన్, తన వెంట తెచ్చుకున్న హాకీ స్టిక్, ఇనుప రాడ్‌తో దీక్షిత్ తలపై తీవ్రంగా దాడి చేశాడు. ఈ దాడిలో తీవ్ర గాయాలపాలైన దీక్షిత్ అక్కడికక్కడే ప్రాణాలు కోల్పోయాడు.

అనంతరం నిందితుడు పవన్ పరాశర్ నేరుగా సిడ్కో పోలీస్ స్టేషన్‌కు వెళ్లి లొంగిపోయాడు. పోలీసులు అతడిని అదుపులోకి తీసుకుని, హత్యకు ఉపయోగించిన కారును, ఇనుప రాడ్‌ను స్వాధీనం చేసుకున్నారు. ఈ హత్య వెనుక పాత కక్షలు లేదా వ్యాపార వివాదాలు ఉండవచ్చని పోలీసులు ప్రాథమికంగా అనుమానిస్తున్నారు. మృతుడు దీక్షిత్ మెస్ నిర్వహించడంతో పాటు, ప్లాట్ల వ్యాపారం కూడా చేసేవాడు. బాధితుడికి, నిందితుడు పవన్‌కు మధ్య కొంతకాలంగా వివాదం నడుస్తున్నట్లు సమాచారం.