పులివెందులలో నామినేషన్ల వేళ హై టెన్షన్.. అవినాశ్ రెడ్డి ఇంటికి పోలీసుల నోటీసులు

కడప జిల్లా పులివెందులలో స్థానిక సంస్థల ఎన్నికల నామినేషన్ల ప్రక్రియ తీవ్ర ఉద్రిక్తతల మధ్య కొనసాగుతోంది. శాంతిభద్రతల పరిరక్షణ పేరుతో పోలీసులు కఠిన ఆంక్షలు విధించారు. ఇందులో భాగంగా వైసీపీ ఎంపీ వైఎస్ అవినాశ్ రెడ్డి నివాసానికి పోలీసులు అధికారికంగా నోటీసులు జారీ చేయడం స్థానికంగా చర్చనీయాంశమైంది.

పులివెందుల పట్టణంలో బీఎన్ఎస్ సెక్షన్ 163, పోలీస్ యాక్ట్ సెక్షన్ 30 కింద కఠిన ఆంక్షలు అమల్లో ఉన్నాయని పులివెందుల అర్బన్ సర్కిల్ ఇన్‌స్పెక్టర్ పేరుతో జారీ చేసిన నోటీసులో స్పష్టం చేశారు. ఎన్నికల నిబంధనల ప్రకారం ఎలాంటి ర్యాలీలు, బహిరంగ సభలు, ధర్నాలకు అనుమతి లేదని తెలిపారు. నలుగురు లేదా ఐదుగురి కంటే ఎక్కువ మంది గుమిగూడితే నిబంధనల ఉల్లంఘనగా పరిగణించి కఠిన చర్యలు తీసుకుంటామని హెచ్చరించారు.

అయితే, పోలీసుల చర్యలపై ఎంపీ అవినాశ్ రెడ్డితో పాటు వైసీపీ శ్రేణులు తీవ్ర ఆగ్రహం వ్యక్తం చేస్తున్నాయి. తమ పార్టీ అభ్యర్థులు నామినేషన్లు వేయకుండా అడ్డుకునేందుకే అధికార పక్షం ఒత్తిడితో పోలీసులు ఈ ఆంక్షలు విధిస్తున్నారని వారు ఆరోపిస్తున్నారు. పోలీసులు ఏకపక్షంగా వ్యవహరిస్తూ ప్రతిపక్షాన్ని అణిచివేసే ప్రయత్నం చేస్తున్నారని విమర్శించారు. ఎలాంటి అవాంఛనీయ ఘటనలు జరగకుండా పట్టణంలో భారీగా పోలీసులను మోహరించారు.