విజయనగరం కార్పొరేషన్ ఎన్నికల పోలింగ్ తేదీ మార్పు

విజయనగరం నగరపాలక సంస్థ ఎన్నికల పోలింగ్ తేదీలో మార్పు జరిగింది. ముందుగా ప్రకటించినట్లు అక్టోబర్ 28న కాకుండా, అక్టోబర్ 29న పోలింగ్ నిర్వహించనున్నట్లు రాష్ట్ర ఎన్నికల సంఘం (ఎస్ఈసీ) స్పష్టం చేసింది. ప్రసిద్ధ పైడితల్లి అమ్మవారి సిరిమాను ఉత్సవం కారణంగా ఈ నిర్ణయం తీసుకున్నట్లు తెలిపింది.

విజయనగరంలో అక్టోబర్ 27న సిరిమాను ఉత్సవం జరగనుంది. ఈ ఉత్సవానికి సుమారు 4 నుంచి 5 లక్షల మంది భక్తులు హాజరవుతారని జిల్లా యంత్రాంగం అంచనా వేస్తోంది. ఈ నేపథ్యంలో భద్రతా సిబ్బంది కేటాయింపు, ట్రాఫిక్ నియంత్రణ వంటి పరిపాలనాపరమైన ఇబ్బందులు తలెత్తుతాయని, అందువల్ల పోలింగ్ తేదీని మార్చాలని జిల్లా కలెక్టర్ ఎస్ఈసీకి విజ్ఞప్తి చేశారు. ఈ విజ్ఞప్తిని పరిశీలించిన ఎస్ఈసీ, పోలింగ్‌ను ఒక రోజు వాయిదా వేసింది.

కొత్త షెడ్యూల్ ప్రకారం, అక్టోబర్ 29న ఉదయం 7 గంటల నుంచి సాయంత్రం 5 గంటల వరకు పోలింగ్ జరగనుంది. ఓట్ల లెక్కింపు మాత్రం ముందుగా ప్రకటించినట్లే అక్టోబర్ 30న ఉదయం 8 గంటల నుంచి యథాతథంగా కొనసాగుతుంది. ఒకవేళ ఎక్కడైనా రీ-పోలింగ్ అవసరమైతే, దానిని అక్టోబర్ 30న నిర్వహిస్తారు. రీ-పోలింగ్ పూర్తయ్యే వరకు తుది ఫలితాలు ప్రకటించవద్దని జిల్లా అధికారులకు ఎస్ఈసీ స్పష్టమైన ఆదేశాలు జారీ చేసింది.

ఇక ఎన్నికల ప్రచార గడువులో ఎలాంటి మార్పు లేదు. ఇతర పట్టణ స్థానిక సంస్థలతో పాటే విజయనగరంలోనూ అక్టోబర్ 26 సాయంత్రం 5 గంటలకు ప్రచారానికి తెరపడనుంది.