పార్టీని ధిక్కరిస్తే వేటు తప్పదు.. రెబల్స్‌కు చంద్రబాబు వార్నింగ్

స్థానిక సంస్థల ఎన్నికల్లో పార్టీ ఆదేశాలను ధిక్కరించి రెబల్స్‌గా పోటీ చేసే వారిపై కఠిన చర్యలు తప్పవని ఆంధ్రప్రదేశ్ ముఖ్యమంత్రి, టీడీపీ అధినేత చంద్రబాబు హెచ్చరించారు. ఈరోజు పార్టీ నేతలతో నిర్వహించిన టెలికాన్ఫరెన్స్‌లో ఆయన ఈ మేరకు స్పష్టమైన ఆదేశాలు జారీ చేశారు. తిరుగుబాటు అభ్యర్థులుగా దాఖలు చేసిన నామినేషన్లను వెంటనే ఉపసంహరించుకోవాలని, కూటమి అధికారిక అభ్యర్థుల గెలుపు కోసం ప్రతి ఒక్కరూ కృషి చేయాలని ఆయన సూచించారు.

అభ్యర్థుల ఎంపిక, ప్రచార కార్యక్రమాలను మిత్రపక్షాలైన జనసేన, బీజేపీలతో సమన్వయం చేసుకుంటూ ముందుకు సాగాలని చంద్రబాబు దిశానిర్దేశం చేశారు. సాధారణ ఎన్నికల్లో సాధించిన ఫలితాల కన్నా మెరుగైన ఫలితాలు స్థానిక ఎన్నికల్లో సాధించాలని ఆయన ఆకాంక్షించారు. పాలనలో అన్ని వర్గాలకు ప్రాతినిధ్యం కల్పించే లక్ష్యంతో, టీడీపీ పోటీ చేస్తున్న 11 కార్పొరేషన్లను 11 వేర్వేరు సామాజిక వర్గాలకు కేటాయించినట్లు వెల్లడించారు.

పార్టీ అధికారిక అభ్యర్థులకు బీ-ఫారాలు సకాలంలో అందజేయాలని, పార్టీ నిర్ణయాన్ని ధిక్కరించి బరిలో నిలిచే వారిపై వేటు తప్పదని చంద్రబాబు స్పష్టం చేశారు. "కూటమిగా మూడు పార్టీలు కలిసి పోటీ చేస్తున్నప్పుడు స్వతంత్రంగా నామినేషన్లు వేయడం సరికాదు. కేటాయించిన స్థానాల్లో మిత్రపక్షాల అభ్యర్థులను గెలిపించాల్సిన బాధ్యత మనందరిపైనా ఉంది" అని స్పష్టం చేశారు.

పొత్తులు, సర్దుబాట్ల కారణంగా ఈ ఎన్నికల్లో టికెట్లు దక్కని పార్టీ కార్యకర్తలకు భవిష్యత్తులో నామినేటెడ్ పోస్టులు ఇచ్చి న్యాయం చేస్తామని చంద్రబాబు భరోసా ఇచ్చారు. ప్రభుత్వ అభివృద్ధి, సంక్షేమ పథకాలను వివరిస్తూ ఇంటింటి ప్రచారం నిర్వహించాలని ఆయన పార్టీ శ్రేణులకు పిలుపునిచ్చారు.

"ఈ ఎన్నికలు పూర్తయ్యే వరకు నేను ముఖ్యమంత్రిగా కాకుండా, కేవలం పార్టీ అధ్యక్షుడిగానే వ్యవహరిస్తా. మంత్రులు, ఎమ్మెల్యేలు సైతం పార్టీ కార్యకర్తలుగానే పనిచేయాలి. ఈ నెల రోజుల సమయం మనందరి పనితనానికి పరీక్ష. సార్వత్రిక ఎన్నికల్లో సాధించిన 57 శాతం స్ట్రైక్ రేట్‌ను మించి స్థానిక ఎన్నికల్లో విజయం సాధించాలి" అని చంద్రబాబు లక్ష్యంగా నిర్దేశించారు.