యెమెన్‌లో దారుణం.. సైనిక శిబిరంపై క్షిపణి దాడిలో 25 మంది మృతి

యెమెన్‌లో సోమవారం ఘోరమైన క్షిపణి దాడి చోటుచేసుకుంది. దేశ ఆగ్నేయ ప్రాంతంలోని షబ్వా ప్రావిన్స్‌లో గల ఒక సైనిక శిక్షణా శిబిరంపై జరిగిన ఈ దాడిలో కనీసం 25 మంది సైనికులు ప్రాణాలు కోల్పోగా, మరో 30 మందికి పైగా తీవ్రంగా గాయపడ్డారు.

'షిన్హువా' కథనం ప్రకారం.. జర్డాన్ జిల్లాలోని అల్-ఆలం సైనిక స్థావరంలో గల శిక్షణా శిబిరాన్ని లక్ష్యంగా చేసుకుని మూడు క్షిపణులు దూసుకొచ్చాయి. ఈ దాడి జరిగినట్లు ప్రభుత్వ సైనిక అధికారి ఒకరు ధ్రువీకరించారు. మృతుల సంఖ్య మరింత పెరిగే అవకాశం ఉందని, కొన్ని మృతదేహాలు పూర్తిగా కాలిపోవడంతో వాటిని గుర్తించడం కష్టతరంగా మారిందని స్థానిక వైద్య వర్గాలు వెల్లడించాయి. సహాయక బృందాలు క్షతగాత్రులను చికిత్స నిమిత్తం షబ్వాలోని ఆసుపత్రులకు తరలిస్తున్నాయి.

ఈ ఘాతుకం వెనుక హౌతీ గ్రూప్ హస్తం ఉందని ప్రభుత్వ వర్గాలు ఆరోపిస్తున్నాయి. అయితే, ఈ దాడికి తామే బాధ్యులమని హౌతీలు ఇప్పటి వరకు ప్రకటించలేదు. ఈ సైనిక స్థావరాన్ని అంతర్జాతీయ గుర్తింపు పొందిన యెమెన్ ప్రభుత్వ దళాలతో పాటు సౌదీ నేతృత్వంలోని సంకీర్ణ బలగాలు వినియోగిస్తున్నాయి. గత కొద్ది రోజులుగా ప్రభుత్వ దళాలకు, హౌతీలకు మధ్య పోరు ఉధృతమైన నేపథ్యంలో ఈ దాడి జరగడం గమనార్హం.